O'FA rahbariyati “Evima Football” kompaniyasi vakillari bilan uchrashdi

"Malumki, mazkur kompaniya ayollar sporti bo'yicha turli xil tadbirlar o'tkazish bo'yicha dunyoda o'z o'rniga ega. “Evima Football” Bolgariya va Turkiyada futbol turnirlari va yig'inlar tashkil etishga ixtisoslashgan.

Bugungi uchrashuvda kompaniya rahbari Evgeniy Marinov va ayollar bo'limi boshlig'i Anastasiya Juravlyova ishtirok etdi.

O'FA birinchi vice-prezidenti Ravshan Ermatov ayollar futbolining jahon sportida tutgan o'rni katta ekanini takidlab, mamlakatimizda ham xotin-qizlarni sportga, xususan, futbolga jalb etish borasida tizimli ishlar yo'lga qo'yilayotganini qayd etdi. O'zbekiston ayollar terma jamoasining oldiga ulkan maqsad va vazifalar qo'yilganligi, bu borada jamoaga yaponiyalik murabbiylar jalb etilayotgani borasida malumot berdi.

SHuningdek, O'FA vice-prezidenti Odil Ahmedov barcha terma jamoalarimiz qatori ayollar jamoamiz ham xalqaro musobaqalarda ko'proq ishtirok etishi kerakligini, bu futbolchilar uchun katta tajriba berishini takidladi. 

O'z o'rnida “Evima Football” vakillari O'zbekistonning Markaziy Osiyo davlatlari orasida ushbu yo'nalishga katta o'sishga erishayotganini etirof etishdi. Ayollar futboli turnirlarini tashkil etish bo'yicha o'z tajribalari bilan o'rtoqlashishga tayyor ekanligini bildirishdi.

Uchrashuvda tomonlar kelajakda istiqbolli loyihalarni birgalikda amalga oshirishga doimo tayyor ekanligini takidladilar", – deyiladi O'FA matbuot xizmati xabarida.