Nodir Eliboev: "Oldingidek, 1 yoki 2 ta o'yinni kutib yashayotganimiz yo'q. Har bir turda yaxshi raqobat bor"

"O'yin haqida nima deyish mumkin, g'alaba har doim yoqimli. Yigitlar jarohat olganlarning yo'qligini bildirmadi, chunki biz bir jamoamiz. To'g'ri, kamchiliklarimiz ko'p. Yoqimli tomoni – o'yinchilarning ruhiyati. Qozog'iston o'z mavqeiga ega. Bunday jamoani yutaman deb tushish, hujum va himoyada to'g'ri qarorlar qabul qilish yoqimli albatta. Ishlashda davom etamiz. Keyingi o'yinda maydonga tushmagan futzalchilarga imkoniyat beramiz. O'rtoqlik uchrashuvlari shuning uchun ham kerak albatta. Maqsadimiz Jahon chempionatiga chiqish va bu yo'lda har bir o'yin bizni kuchli qilib boradi", – deydi Nodir Eliboev. 

- Islom Birdamlik o'yinlariga yo'l oladigan tarkib aniqmi?

- Bu borada biror narsa deya olmayman. Kuni kecha Jizzaxda chempionat o'yinlari bo'ldi, achinarlisi, 3 nafar o'yinchi jarohat oldi. Undan avvalgi Andijondagi bahslarda 2 nafari jarohat sabab safdan chiqqan edi. Har safar yangi yigitlar qo'shilmoqda. Masalan, Abdulla Solihov Husniddin Nishonovning o'rnini bosishga harakat qildi. Shavkat Ibragimov darvozabon Abbos Elmurodovning yo'qligini bildirmadi. Ularning o'rni bor, lekin yangi kelganlar maksimal harakat qilib yo'qligini bildirmayapti.

- Jarohatlar ko'payganining sababi nimada?

- To'g'risi, biror narsa deya olmayman. Abbos Elmurodov "Humo Arena"da o'tgan Superkubokda jarohat olgandi. U uzoq vaqtdan beri davolanmoqda. Davron Choriev masalasini ham bilasizlar. Yaqinda qaytadi. Hozir tubdan o'zgarishlar ketyapti, oldingidek, 1 yoki 2 ta o'yin kutib yashayotganimiz yo'q. Har bir turda yaxshi raqobat bor. Bunday to'qnashuvlarda jarohat olish tabiiy hol. Barcha maksimal kuchini beradi, jismoniy toliqish ortidan jarohatlar olinadi. Hechqisi yo'q. Bu ham yaxshilikka. Yangi kadrlarni tekshirib olishga, o'z ustimizda ishlashga imkon.

- Oldinlari 2 tadan o'yin o'tkazilardi. Bu safar Yaponiya bilan bir marotaba to'qnash keldik. Qozog'iston bilan bir bor o'ynadik. Bu kimning taklifi bilan bo'lmoqda? 

- O'tgan safar saralashga tayyorgarlik bo'lgani uchun Yaponiya terma jamoasi va O'zbekiston tomoni bitta xulosaga keldi, 2 ta o'yin ortiqchalik qilardi. Jarohat olishimiz, jismonan toliqishimiz mumkin. Qozog'iston bilan ikkinchi o'yinimiz yopiq bo'ladi. 

- Akbar Usmonov haqida...

- Akbar Usmonov Jizzaxda jarohat olgan. U jangchi, jarohatini berkitishga, borini berishga harakat qiladi. Terma jamoaga jalb qilindi. Jarohati chuqurlashmasligi uchun asrashga qaror qildik.