Muzaffar Abdullaev: “Superligada qolish uchun oxirigacha kurashamiz”

Aytish kerakki, qo'qonliklar nihoyat 23-turda g'alaba qozonib, bir pog'ona tepaga yuqorilashga erishdi. 

- “So'g'diyona” bilan o'yindan keyingi taassurotlar bilan o'rtoqlashsangiz....

- Biz har bir uchrashuvga yaxshi tayyorgarlik ko'ramiz. Jumladan, “So'g'diyona”ga qarshi ham astoydil tayyorlandik. CHunki raqib kuchli va oxirgi turlardagi muvaffaqiyatsizliklardan keyin yanada kuchliroq to'p tepishini bilardik. Bu o'yinga omadimiz keldi. Avvalgi bahslarimiz hisobda oldinda bo'lsakda, oxirida mag'lub bo'ldik. Ayrim holatlarda durang o'ynab kelayotgandik. “So'g'diyona” bilan bahsda esa omad biz tomonda bo'ldi va muhim bo'lgan g'alabani qo'lga kiritdik. 

- Cizningcha, g'alaba nimaning evaziga qo'lga kiritildi?

- O'zimizga bo'lgan ishonch yuqorligi g'alabamizga sabab bo'ldi. O'yin yakuniga qadar yigitlar oxirigacha kurashdik. Ahilligimiz samarasi bilan muvaffaqiyat qozondik. 

- Jamoaning joriy mavsumdagi omadsizliklariga nima sabab bo'ldi?

- CHindan ham “Qo'qon-1912” uchun mavsum omadsiz keldi. Oxirgi 4-5 yil davomida jamoa bunchalik qiyinchilikka duch kelmagan. Yuqori o'rinlar uchun kurashib kelgandik. To'g'risi, joriy mavsum ko'p bahslarda omadimiz kelmadi. Keragidan ortiq ochkolarni qo'ldan chiqardik. Bu esa turnir jadvalida pasayish ketishimizga sabab bo'ldi. 

- Jamoa xavfli zonada joy egallagan. Superligada qolish imkoniyatini qanday baholaysiz?

- Superligada qolish uchun oxirigacha kurashamiz. Oldinda turgan bahslarimizda muvaffaqiyat qozonishga intilamiz. Jamoamiz muxlislarini quvontirish uchun ham taslim bo'lmaymiz. Ishonamanki, biz vazifani bajara olamiz. 

- Yakuniga etayotgan mavsum siz uchun qanday kechmoqda?

- Avvalgi mavsumlarda o'z darvozamizdan kam to'p olib chiqardik. Bu yil esa aksincha bo'lmoqda. Ko'p to'p olib chiqmoqdamiz. Albatta, bu darvozabonlar uchun yaxshi holat emas. SHaxsan men ham ko'p o'yinlarimdan qoniqish hosil qilmadim. Aytaylik, 70-80 foizga ko'nglim to'ldi xolos.