Murod Ismoilov: "Levchenko borasida tezkor qaror chiqarilmasligini istardim"

"Neftchi" o'zbekcha klassikoda "Paxtakor"ga yirik hisobda imkoniyatni boy berdi.

Uchrashuvdan avval bo'lgani kabi o'yindan so'ng "Neftchi" va "Paxtakor" sobiq murabbiyi Murod Ismoilovning fikrlarini tingladik.

"O'yinga to'xtaladigan bo'lsak, "sher" har qanday holatda ham "sher" hisoblanadi. "Paxtakor" bu klassikoda har qanday vaziyatda eng yaxshi o'yinini ko'rsatishga harakat qiladi. G'alaba bilan mag'lubiyat doim birga yuradi. 

Men murabbiy borasida tez qaror chiqarilmasligini istardim, chunki Vitaliy Levchenko yaxshi saviyadagi mutaxassis. To'g'ri, ijrochilar bor, muxlislar qo'llab-quvvatlamoqda. Lekin hamma ham Levchenkoning yutishini xohlayaptimikin? Levchenkoga sidqidildan xolis yordam beryaptimikin? Bu ham katta savol tug'diradi. Gvardiolaning kitobida muallifning shunday gapi bor: "Agar siz Gvardiolani taklif qilmoqchi bo'lsangiz, xomiylari, xo'jaynidan tortib farroshlargacha yordamlashishi, aytgan futbolchilarini olib berib sharoitlarni yaratib keyingina natijalarni kuting",- deyiladi. Selekciya borasida Levchenko o'zi istagan futbolchilarni jalb qila oldimi yoki kelgan futbolchilarni o'ynatishga majbur bo'ldimi menga qorong'u. Muxlislar, rahbariyat, futbolchilar ham bu mutaxassisni qo'llab-quvvatlashi kerak. Uyda "Navbahor" ustidan qo'lga kiritilgan g'alabadan keyin viloyat hokimimiz Xayrulla Xayitboevich Bozorov kiyim almashtirish xonasida barchaga minnatdorchilik bildirganida Levchenkoni uzoq tabrikladilar. Shu paytda o'sha joyda turgan hamma ham samimiy xursand edimikin yoki ichidan boshqa narsa o'tdimikin. Men mutaxassis, murabbiy, "Neftchi" muxlisi sifatida Levchenkoga imkoniyat berishda davom etish, kerak deb o'ylayman. Xudo xohlasa hammasi yaxshi bo'ladi",- deydi Murod Ismoilov.