“Metallurg” Jasur Xolto'raev bilan shartnoma imzoladi, Muhammad Isaev ketdi

Jarohati bois Turkiya safariga bora olmagan istedodli hujumchi Islom Isoqjonov individual shug'ullanishni boshladi. Jamoaning ikki nafar iqtidorli yosh o'yinchilari SHahzodbek Nematjonov hamda Humoyunshoh Sayyotovlar esa poytaxtda – O'zbekiston U-20 terma jamoasi yig'inida ishtirok etayapti. Bundan tashqari ham jamoa tarkibida bazi o'zgarishlar mavjud.

Kecha “Metallurg” qarorgohini yarim himoyachi Muhammad Isaev erkin agent sifatida tark etdi. Bir necha mavsum jamoa tarkibida samarali faoliyat olib borgan tajribali futbolchi bilan do'stona xayrlashildi. Muhammad Isaev endi erkin agent sifatida faoliyatini boshqa klubda davom ettiradi. Biz Muhammad Isaevga “Metallurg” PFK rahbariyati va ko'p sonli muxlislari nomidan minnatdorlik bildiramiz va uning kelgusi faoliyatiga omad yor bo'lishini tilaymiz.

Bugun esa “Metallurg” PFK o'z tarkibini bir nafar yangi o'yinchi bilan boyitib oldi. O'tgan mavsum Termizning “Surxon” jamoasida to'p surgan hujumchi Jasur Xolto'raev “Metallurg” bilan shartnoma imzoladi. Futbolchilik faoliyatini 2017 yili G'uzorning “SHo'rtan” jamoasida boshlagan Jasur Xolto'raev 2021 yilgi mamlakat chempionatida “Surxon” safida 25 ta uchrashuvda maydonga tushdi. SHularning 18 tasini asosiy tarkibda boshlagan bo'lsa, 7 bor zahiradan o'yinga qo'shildi. Raqiblar darvozasiga 2 ta gol kiritdi. 3 marta sariq kartochka bilan jazolandi. “Metallurg”ning ahil oilasiga xush kelibsan, Jasur!", - deb yozadi "Metallurg" matbuot xizmati.