"Mashal" keyingi turda Superliga yo'llanmasini naqd qilishi mumkin

Quyi ligada mavsum yakunlanishiga 3ta tur qoldi xolos. Ayni paytda Muborakning "Mashal" klubi katta farq bilan peshqadamlik qilmoqda.

Bu mavsumda A PRO-ligada birinchi o'rinni olgan klub to'g'ridan-to'g'ri Superligaga chiqadi. Ikkinchi o'rinni band etgan klub esa Superligada 13-o'rinni egallagan klub bilan pley-off bahsida maydonga tushadi.

"Iftixor" klubi 24-turdan keyin A PRO-ligadan chetlatilgani bois ushbu klub ishtirokidagi oxirgi to'rtta bahsda texnik mag'lubiyat yoziladi va raqib klublarga 3 ochkodan qo'shib qo'yiladi. Kecha "Neftchi" o'ynamay turib 3 ochko oldi. Keyingi turlarda "SHerdor", "Mashal" va "Xorazm" ham texnik g'alabaga erishishadi.

"Iftixor" bilan texnik g'alabani qo'shganda ayni paytda Asror Aliqulov boshchiligidagi jamoa hisobidagi ochkolar soni 54tani tashkil etmoqda. Ikkinchi o'rinda "Istiqlol" va "SHo'rtan" hisobida bir xil 46tadan ochko bor.

31 oktyabrga belgilangan 26-turda "Mashal" birinchi o'rin masalasi va Superliga yo'llanmasini o'zi uchun ijobiy hal qilishi mumkin. Buning uchun G'uzorda "SHo'rtan" bilan durang o'ynalsa kifoya. Sababi ochkolar teng kelib qolgan taqdirda ham "Mashal" "Istiqlol" va "SHo'rtan"dan o'zaro o'yinlardagi natijalar bo'yicha ustun bo'ladi.

Umuman olganda A PRO-ligada oxirgi turlar ajoyib o'yinlarga boy bo'lishi aniq. Sababi 2 va 6-o'rindagi klublar o'rtasidagi ochkolar farqi atigi 4tani tashkil etadi. Ayni paytda 6-o'rindagi "Neftchi"da ham pley-offda o'ynash uchun imkoniyat saqlanib turibdi.


A PRO-liga-2019 so'nggi 3ta tur juftliklari:

26-tur — 31 oktyabr
Oq-tepa - Neftchi
Iftixor - SHerdor -:+
SHo'rtan - Mashal
Istiqlol - Xorazm


27-tur — 6 noyabr
Istiqlol - Oq-tepa
Xorazm - SHo'rtan
Mashal - Iftixor +:-
SHerdor - Neftchi


28-tur — 13 noyabr
Oq-tepa - SHerdor
Neftchi - Mashal
Iftixor - Xorazm -:+
SHo'rtan– Istiqlol