"Lokomotiv": Bu - uchinchisi

Loko" futbolchilari Toshkentda "Qizilqum"ni qabul qilib, 3:1 hisobida zafar quchishdi. Bu o'yinda Jamshid Iskanderov, Islom To'xtaxo'jaev hamda Temurxo'ja Abduxoliqov tomonidan kiritilgan gollar "temiryo'lchilar"ga navbatdagi uch ochkoni taqdim etdi. 

Qizig'i shundaki, bu o'yin Temurxo'ja Abduxoliqov bilan Islom To'xtaxo'jaev uchun birgalikda gol urgan uchinchi uchrashuv bo'ldi. Esingizda bo'lsa, "Lokomotiv" OCHL 1-turida "Al Vahda"ni 2:0 hisobida mag'lub etgan va o'sha o'yinda ham Abduxoliqov bilan To'xtaxo'jaev gol urishgandi. 

Keyinchalik Superliganing 4-turida "Loko" AGMKdan 2:1 hisobida ustun keldi va bu o'yinda raqib darvozasiga kiritish yana Temurxo'ja bilan Islomga nasib etdi. Mana endi kecha "Qizilqum"ga ham shu ikki futbolchi gol urishga muvaffaq bo'ldi. SHunday qilib bunday omadli yurish uchinchi marta yuz berdi.