Legionerlar. Olti nafar futbolchimiz uchun mavsum tugadi

Xususan, Vitaliy Denisov “Lokomotiv” safida uchinchi o'rinni qo'lga kiritgan bo'lsa, Odil Ahmedov to'p tepgan “Anji” chempionatda oxirgi o'rinni egallab, birinchi divizionga tushib ketdi. Rossiya birinchi ligasida o'ynayotgan Vadim Afonin jamoasi “Gazovik” esa  mavsumni beshinchi o'rinda tugatdi.

Bu yilgi mavsumni Turkiya birinchi ligasida o'tkazgan Dilshod Rahmatullaev uchun chempionat o'rtacha kechdi. Uning klubi “SHanliurfaspor” 11-o'rinni qo'lga kiritdi.

BAAda o'ynagan ikki legionerimiz Aziz Haydarov bilan Oybek Qilichev uchun ham mavsum ikki xil yakunlandi. Aziz Haydarov to'p tepayotgan “Al SHabab” 4-o'rinni egallagan bo'lsa, Oybek Qilichev o'ynagan “Al SHaab” kuchlilar safini tark etdi.



ROSSIYA. Premer-liga
Vitaliy Denisov (“Lokomotiv”)
“Lokomotiv” chempionatni uchinchi o'rinda tugatdi. Vitaliy Denisov ajoyib mavsumni o'tkazdi. Aksariyat o'yinlarda etakchi sifatida harakat qildi. Bir necha bor tur ramziy termasiga kiritildi.

Odil Ahmedov (“Anji”)
“Anji” uchun joriy mavsum juda omadsiz keldi. Klub oxirgi o'rinni olib elitadan tushib ketdi. Ammo Odil Ahmedov o'zidan yaxshi taasurot qoldirdi. U jamoasining deyarli barcha o'yinlarida qatnashib 90 daqiqadan harakat qildi.



ROSSIYA. Birinchi divizion
Vadim Afonin (“Gazovik”)
“Gazovik” Rossiya birinchi divizionida 19 jamoa orasida 5-o'rinni egalladi. Bu klubda faoliyatini o'tkazgan Vadim Afonin uchun ushbu chempionat yaxshi kechdi. Futbolchimiz deyarli barcha o'yinlarda 90 daqiqadan to'p tepdi.

TURKIYA. 1-liga
Dilshod Rahmatullaev (“SHanliurfaspor”)
Turkiya birinchi ligasida hozircha kuchli oltilikka kirgan klublar o'rtasida pley-off bahslari o'tkazilmoqda. Dilshod Rahmatullaev klubi “SHanliurfaspor” 19 jamoa orasida 11-o'rinni qo'lga kiritdi. Demak, Rahmatullaev uchun ham mavsum tugadi. Dilshod o'zining yangi jamoasida o'rtacha o'yin ko'rsatdi.

BAA. Premer-liga
Aziz Haydarov (“Al SHabab”)
“Al SHabab”ning uchinchi o'rinni olishiga ozgina etmadi. Jamoa “Al Jazira”dan atigi bir ochko kam to'plab, to'rtinchi o'rin bilan kifoyalandi. Haydarov uchun esa mavsum o'rtacha kechdi. U ko'p uchrashuvlarda jamoa etakchisi sifatida namoyon bo'ldi.



Oybek Qilichev (“Al SHaab”)
BAA chempionatida 14ta klub ishtirok etadi. Oybek Qilichev to'p tepgan “Al SHaab” oxirgi o'rinni olib premer-ligadan tushib ketdi. “Al SHaab” atigi 13 ochko jamg'ardi. Bu esa Qilichevga ham tasir ko'rsatmay qolmadi. Katta ehtimol bilan u ortga qaytib kelsa kerak.

Xayrulla Xoliqov.