Hakim Fuzaylov: "Shunday yuqori talablar orqali o'zbek futboli tartiblanib boradi"

"O'yin qiyin kechishini taxmin qilgandik. "Dinamo" joriy o'z oldiga katta maqsad qo'ygan va ushbu maqsadlarga erishish uchun harakat qilmoqda. Ancha yorqin jamoa shakllangan. Biz ham shunday. Biz ham yomon o'ynamayapmiz. Men bilishimcha, qaytgan to'pga egalik qilish bo'yicha "Dinamo" Superligada etakchi jamoa. Aynan shu jabhada biz raqibga yutqazib qo'ydik. Yana gollar urishimiz mumkin edi. Hayot davom etadi. Futbolchilar biroz ranjishdi. Endi keyingi uchrashuvga etibor qaratishimiz kerak. Xafa bo'lib o'tirishga vaqt yo'q", - dedi Hakim Fuzaylov bugungi bahs yakunlangach.

- "Xorazm" tarkibida ko'p futbolchilar o'tgan mavsumlarda "Dinamo" tarkibida to'p tepgan edi. Ushbu futbolchilar bugungi o'yinga qo'shimcha ishtiyoq bilan maydonga tushdimi?

- Ochig'ini aytsam, biz yangi jamoa tuzdik. "Xorazm" esa 15 yil deganda endi eng yuqori divizionga qaytdi. Futbolchilarga motivaciya berib o'tirish kerak emas. Biz ushbu tarkibni yanvar oyida yig'dik. Biz uchun har bir o'yin finaldek. Ishtiyoq yuqori bo'lishi kerakligi tabiiy.

- "Xorazm" qachon uy uchrashuvlarini o'z stadionida o'tkaza boshlaydi?

- Yaqin orada. "Andijon"ga qarshi yaqinlashib kelayotgan o'yinni ham Jizzaxda o'tkazsak kerak. Bizda maydon allaqachon tayyor, yoritish tizimi ham. VAR texnikalari ham etib keldi. Faqatgina tekshiruvdan o'tishimiz kerak. Balki "Navbahor"ga qarshi 2 iyuldagi o'yinni o'z uyimizda o'tkazarmiz.

- PFLning bunday talablari juda qattiq emasmi? Masalan, "Surxon" uzoq vaqt davomida Toshkentda o'ynadi. O'tgan yili esa "Qizilqum"...

- Aksincha, bu yaxshi. Masalan, terma jamoamiz ilk marotaba mundialga chiqdi. Shunday yuqori talablar orqali o'zbek futboli tartiblanib boradi.