Hakim Fuzaylov: "O'rtoqlik uchrashuvlaridagi natijalar meni xavotirga solmaydi"

 O'yindan so'ng "Buxoro" bosh murabbiyi Hakim Fuzaylov o'z fikrlari va jamoa rejalari haqida gapirib o'tdi:

"Qisqacha to'xtaladigan bo'lsam, biz o'z ishimizni davom ettiryapmiz. 3 yanvardan boshlangan, salkam bir oydan oshiq davom etayotgan yig'inimizning asosiy pallasiga etib kelyapmiz, hozir ekvator chizig'idamiz.

Toshkentdagi yig'indan hozirgi yig'inni farqi, futbolchilarga ko'plab yuklamalar beryapmiz, ular og'irlikni his qilishyapti. To'g'risini aytsam, o'rtoqlik uchrashuvlaridagi natijalar meni unchalik xavotirga solmaydi. Ha, yutqazdik. Umuman olganda, yuklamalardan so'ng, futbolchilarimning o'yinni olib borishi meni qoniqtiryapti, yomon emas hozirgi vaqt uchun.

Solishtirish uchun aytaman, men o'tgan yili "Dinamo" bosh murabbiyi bo'lgan vaqtimda ham, xuddi shu jamoalar bilan mavsum oldi uchrashuvlar o'tkazgan edik. O'shanda Muborakda, o'z darvozamizdan, 3ta o'tkazib yuborganmiz, vaholanki o'sha uchrashuvda hatto, 6 ta to'p o'tkazib yuborishimiz ham mumkin edi. Samarqandda ham, "SHo'rtan"ga 0:2 hisobida mag'lubiyatga uchraganmiz.

Keyin esa nimalar bo'lganini siz yaxshi xabardorsiz, "Dinamo" bilan, mavsum tugashiga 4 tur qolganda Superliga yo'llanmasini naqd qilgan edik. Bu bilan nima demoqchiman? Bizda hammasi joyida, ishlar reja bo'yicha ketyapti. To'g'ri, hatto nazorat uchrashuvlarida ham, mag'lubiyatga uchrash yoqimsiz holat, ko'ngilni xira qiladi. Ammo, bundan xulosa chiqarib, yana maqsad sari, jamoani xotirjamlik bilan Superligaga chiqarish uchun tayyorlab boramiz.

Endi, og'ir yuklamalardan so'ng futbolchilarga 2 kun dam beramiz, ular 1 oy davomida, 9 ta uchrashuv o'tkazishdi. 9 fevraldan, yana Toshkent shaxrida yig'ilamiz. U erda ham, ko'plab sinov-nazorat uchrashuvlari o'tkazish rejamizda bor. 12 fevralda "Qo'qon 1912", 15 fevralda esa "Surxon" jamoasi bilan, hamda 18 fevralda "Paxtakor" o'rinbosarlariga qarshi o'yin o'tkazish bo'yicha kelishuvga erishganmiz. 21 yoki 22-fevralda ham albatta raqib topishga harakat qilamiz. SHundan so'ng Buxoroga qaytamiz", - deydi Hakim Fuzaylov. 

Video. O'rtoqlik uchrashuvi. "Buxoro" "SHo'rtan"ga yutqazdi