"Galatasaroy" Koutinoni ijaraga oladi

Turkiyaning "Galatasaroy" klubi braziliyalik futbolchiga shu hafta "Aston Villa"ni tezda tark etish imkonini beradigan shartnoma taklif qilmoqda. Istanbul giganti mamlakatda chorshanba kuni transfer oynasi yopilguniga qadar Braziliya terma jamoasi futbolchisini tarkibiga qo'shib olmoqchi. "Galatsaroy" APL vakilini bitimga ko'ndirishga urinmoqda. Ammo "Villa" o'tgan yozda Koutinoni butunlay o'ziniki qilish uchun sarflagan 17 mln funtning hech bo'lmaganda bir qismini qaytarib olishni istaydi. 

Klubga yangi bosh murabbiy Unai Emeri tayinlangandan so'ng Koutinoning Janubiy Amerikaga qaytishi mumkinligi aytilgan edi. Sobiq "Liverpul" yulduzi joriy mavsumda birorta gol urmadi va golli uzatmani amalga oshirmadi. U hali Emeri qo'l ostida birorta o'yin o'tkazganicha yo'q. 

Koutino "Aston Villa"ning eng ko'p maosh oluvchi o'yinchilaridan biri hisoblanadi. U haftasiga 125 ming funt ishlab topadi. "Galatasaroy" futbolchiga asosiy tarkibdan joy vada qila oladi. Uning kelasi yili evrokuboklarda ishtirok etishi ehtimoli yuqori.

Filippe Koutino 2022 yilning yanvar oyida "Barselona"dan ijaraga olingandi. Ajoyib yarim yildan keyin futbolchi doimiy asosda Angliya chempionatiga yo'l oldi.