"Bunyodkor": OFKning ikki kunlik seminari yakunlandi

Unda 2016 yilgi OFK kubogi va OCHL musobaqasida ishtirok etadigan klublarning menejerlari va matbuot kotiblari ishtirok etishdi. Marosimda “Bunyodkor” FK nomidan Islomjon Xodjaev (jamoa menejeri) va Bahodir Mirzaev (matbuot kotibi) qatnashishdi.

Seminarning birinchi kunida asosan 2015 yilgi mavsum tahlili va navbatdagi musobaqalar oldidan reglamentda yuz bergan o'zgarishlarga alohida to'xtalib o'tildi. O'zgarishlardan ko'pchilikning etiborini tortgan jihat sifatida, OFK kubogi va OCHL musobaqalarining mukofot jamg'armalari ikki barobarga oshirilganligi bo'ldi. SHuningdek, seminarning dastlabki kunida har ikkala musobaqaning guruh bosqichi uchun rasmiy qura marosimi o'tkazildi.

11 dekabr kungi ilmiy seminarning birinchi yarmida ham musobaqalar tartib-qoidalari haqida tushunchalar berildi. SHifokorlar masalasiga urg'u qaratildi. Muxlislar bilan ishlash bo'yicha ko'rsatmalar aytib o'tildi. Tushlikdan keyin esa klublar vakillari “pley-off” va guruhdagi raqiblari uchun o'z jamoalarini maxsus slaydlar asosida tanishtirishdi. SHundan so'ng OFK marketing xizmati xodimlari klublar vakillaridan jamoalarning rasmiy liboslarini belgilangan tartib asosida qabul qilib olishdi.

SHu tariqa, 2016 yilgi mavsum oldidan OFK kubogi va OCHL musobaqalari ishtirokchilari uchun uyushtirilgan seminar yakunlandi.