Bobur Zuhriddinov: "O'ylagan rejalarimiz qisman amalga oshdi"

O'yin haqida

- Bugun jamoamiz futbolchilari 200 foiz kuch bilan harakat qilishdi. Aytaylik, birinchi bo'limda  bizda xato va kamchiliklar kuzatildi. Tanaffusdan keyin tashabbus biz tomonga o'tdi. Zaxiradan maydonga tushgan futbolchilar o'yinni kuchaytirdi. Gol urishimiz bo'lgan vaziyatlardan foydalana olmadik. Birinchi bo'limda bizga, ikkinchi taymda mehmonlarga omad kulib boqdi.

- Mikola Agapov o'yin davomida ko'p xatoga yo'l qo'ydi. Bunga fikringiz qanday?

- Biz aynan shu masalada ishlayapmiz. Aslida Mikola ajoyib futbolchi va potenciyali yuqori. Biroq unga sovuqqonlik etishmayapti. SHu sababli mashg'ulotlarda u bilan ishlamoqdamiz.

- Molochko zaxira olindi. Unga oxirigacha imkoniyat berilsa yaxshi bo'larmidi...

-  Molochkoni zaxirga olishimizga sababi bu o'yin rejamizda bor edi. Biz unga 60 daqiqalik reja qilgan edik. Molochkodan tashqari bizda Said G'ulomov ham bor. u o'yinni kuchaytirishi kerak edi. 

- Xudoyorxon Sagdullaev mavsum boshidan beri o'yinida o'sish kuzatilmoqda. SHunga qaramay, u zaxiradan maydonga tushmoqda.

-  Unda ham xuddi Agapovdagi holat mavjud. Biz murabbiylar shtabi uning ham potencialini yuqori baholaymiz. Zaxiradan maydonga tushayotganiga kelsak, bu o'yinga bo'lgan rejaga bog'liq. Bugun ham u ikkinchi bo'limda o'yinni kuchaytirishi kerak edi va shu sababli zaxiradan maydonga tushdi.

-  Aytingchi, bugun jamoa xato qildimi yoki siz?

-  Bugun men yoki jamoa xato qildi demayman. Jamoada butun murabbiylar shtabi ishlaydi. Qarorni birgina o'zim qabul qilmayman.  Bugun murabbiylar xato qildi demayman. O'ylagan rejalarimiz qisman amalga oshdi. Futbolchilar ham xato qildi demayman.

-  Ko'rinib turibdiki, bugun asosan siz maydon chetida futbolchilarga ko'rsatma berdingiz. Jamoada murabbiy o'zgardimi?

-  Dilyaver akani ozgina mazasi yo'q edi. Natijada, o'yinga 3 kun qolganida qo'shildi. Bunga qadar men yordam berib turgandim. Hozir biz birgalikda ish olib bormoqdamiz.

-  "Mashal" birinchi va ikkinchi davra bahslarida "Andijon"ga yutqazgandi. Bugun jamoa o'yinida o'zgarish ko'zga tashlandimi?

-  Bundan avvalgi o'yinda ham “Mashal” yomon o'ynamagan. Unda men U-19 jamoasida ishlayotgandim. Aytaylik, avvalgi bahsda “Mashal” qaysidir jabhada raqibga yutqazdi, demagan bo'lardim. “Andijon” ham avvalgi bellashuvda yaxshi o'ynagandi.