Birinchi liga, “G'arb” mintaqasi. Aprel oyining eng yaxshi futbolchisi – Nizom Norov!

1-o'ringa uzoq o'ylanishlardan so'ng Nizom Norovni qo'ydik. Bu yil “Xorazm” sharafini himoya qilayotgan hujumchi jamoasi bilan birga ortda qolgan oy davomida ijobiy    natijalar qayd etdi. Norovga to'xtaladigan bo'lsak, termizlik futbolchi aprelda bo'lib o'tgan 6ta o'yinda raqiblar darvozasiga 4 bor yo'l topa olgani bilan etiborni tortdi. Ahamiyatlisi Nizom gol urgan o'yinlarda “Xorazm” mag'lub bo'lmagan. O'tgan mavsumda ham bu hujumchi “CHust-Paxtakor”da o'ynab to'purarlar qatoridan joy olgandi. Bu yil “Xorazm” murabbiylarining undan umidi katta.

2-o'ringa Navro'zbek Haipov munosib ko'rildi. “Orol”ning ishongan hujumchilaridan biri bo'lmish Haipov aprel oyi davomida jamoasi uchun 3 bor foydali gollar urishga erishdi. Umuman aytganda Nukus jamoasi ham o'tgan oyda yaxshi natijalar qayd etdi. 24 yoshli futbolchi esa mazmunli o'yinlari natijasida muxlislar olqishiga sazovor bo'ldi.

3-o'ringa Eldor Tojiboevni kiritdik. O'ylaymizki ushbu tanlovimiz bilan yanglishmadik. Sababi shu kungacha “SHo'rtan”ning barcha uchrashuvlarida o'ynab kelayotgan darvozabon aprel oyida atiga bir bor o'z darvozasidan to'p olib chiqishga majbur bo'ldi. G'uzorliklarning chempionatda mag'lubiyatga uchramay kelayotganiga aynan Tojiboevning ham hissasi katta bo'lmoqda deyish mumkin.
   
“G'arb” mintaqasi. Aprel oyining eng yaxshi futbolchisi!   
1. Nizom Norov – “Xorazm”
2. Navro'zbek Haipov – “Orol”
3. Eldor Tojiboev – “SHo'rtan”