Aleksandr Mochinov: "Buxoro" futbolini yuqori darajaga chiqarishni rejalashtirganmiz"

"Avvalo "Bunyodkor"ni g'alaba bilan tabriklayman. O'yin qiziqarli kechdi. Lekin keraksiz vaziyatlarda gol o'tkazib yubordik. Himoyadagi bazi xatolarimiz tufayli gollar yuzaga keldi. "Bunyodkor"dek jamoa bilan bo'ladigan o'yinda bunaqangi xatolar kechirilmaydi", - deya o'z so'zini boshladi Aleksandr Mochinov.

- Jamoa to'p bilan juda sekin harakatlandi. Bu nima bilan bog'liq?
- Buni ko'rib chiqamiz va muammo qaerda ekanligiga oydinlik kiritib olamiz. CHempionat endi boshlandi, xato va kamchiliklar ustida ish olib borishda davom etamiz.

- "Buxoro" oldiga qanday vazifa qo'yilgan?
- Avvalo yaxshi raqobatdosh jamoani tashkil etish asosiy vazifa qilib qo'yilgan. Buxoroda futbolni ko'tarib, yuqori darajadaga chiqishni maqsad qilganmiz. Kelajakda Osiyo chempionlar ligasi musobaqasida vatanimiz sharafini himoya qilishni istaymiz.

- Siz boshchiligizda "Buxoro"dan boshqacharoq, yani yorqinroq o'yin kutgandik, ammo...?
- Hayajon biroz bo'lsada o'z so'zini aytdi. Hali oldinda ko'plab o'yinlar va butun boshli chempionat turibdi. O'ylaymanki, jamoamiz o'yindan-o'yinga shakllanib boradi va o'zimiz istagandek futbol ko'rsatamiz.

- Matbuotda "Buxoro"ga yana bir legioner kelishi haqida yozilgandi. Biroq bugun u qaydnomada ko'rinmadi?
- Ruminiyalik futbolchi kelishi kutilmoqda va yana bir futbolchining avvalgi klubi bilan muammolari bor ekan. SHu sababli ularning kelishi biroz kechikdi. Ruminiyalik legioner ertaga kelishi ko'zda tutilgan.