Akbar Usmonov: "Futzalda o'yinlar muxlislarga qulay vaqtda bo'lishi muhim, guruhimizda teng kuchli jamoalar o'rin olgan"

O'zSQB jamoasi ilk bor professional miqyosda katta turnirda yurishini boshlaydi. Tarkibiga nomdor futzalchilarni jalb qilgan jamoa "D" guruhida "Lokomotiv", "Dinamo", "Nasaf" bilan to'qnash keladi. Ushbu uchrashuvlar oldidan yangi mavsumni O'zSQB tarkibida o'tkazadigan Akbar Usmonovga yuzlandik. 

- Futzal bo'yicha O'zbekiston Kubogiga tayyorgarlik qanday ketmoqda? Yangi jamoa bilan Kubok bahslaridan nimalarni kutyapsiz?

- Ayni paytda mashg'ulotlarni qizg'in ravishda olib bormoqdamiz. O'ylaymanki, O'zbekiston Kubogi qiziqarli kechadi. Ayniqsa, bizning guruhni aytgan bo'lardim. Sababi guruhimizda teng kuchli jamoalar joy olgan. 

- Yangi formatning qanday afzalliklari bor?

- Kubokning yangicha formatda o'tishi menga yoqdi. O'yinlarning ko'pligi va mamlakatimizning turli manzillarida o'tishi bilan avvalgilaridan ajralib turibdi. Bu muxlislarni ham quvontiradi. 

- O'zSQB tarkibida yana kimlarni ko'rishimiz mumkin?

- Jamoamizga xorijdan o'yinchilar kelishi kutilmoqda. Buning ustida ish olib borishyapti. Jamoada kim o'ynashidan qati nazar sog'lom raqobat va O'zbekiston futzalining o'sishi tarafdorimiz. 

- O'yinlarning vaqti avvalgilaridan farq qilmoqda. Bu esa muxlislarga qulaylik tug'dirishi shubhasiz. Futzalchi sifatida bunga munosabatingiz qanday? 

- O'yinlarning erta bo'lishiga qarshiman albatta. Bu borada sezilarli o'sishga erishilgani xursand qildi. Uchrashuvlarning muxlislarga qulay vaqtda o'tishi muhim. Tomoshabinlar sportning yarim bo'lagi.