Abdusamad Do'rmonov: "Futbolda hamma narsa bo'lishi mumkin"

- Abdusamad aka, bugun bo'lib o'tgan Farg'ona derbisi haqida fikrlaringiz qanday?
- Bugun qiyin o'yin bo'lishini bilardik va shunga mos ravishda tayyorgarlik ko'rdik. Bugun kichik derbi uchrashuviga guvoh bo'ldik. O'tgan o'yindan so'ng jamoamiz futbolchilari bilan gaplashdik. Futbol shunaqa, g'alaba ham, mag'lubiyat ham bo'ladi. Uyda o'tadigan o'yinlarda ochko yo'qotish kerak emas. Bugun jamoamiz futbolchilari yaxshi harakat qilishdi, natija ham o'yinga mos bo'ldi. Umuman aytganda bugungi uchrashuv uchun hech kimga etirozim yo'q.

- O'yin avvalgilaridan ertaroq, soat 14:00 da boshlanganligi qiyinchilik tug'dirmadimi?
-Yo'q, hozirgi kunda butun dunyoda bunday vaqtda futbol o'ynashmoqda. 14:00 dami, 15:00 dami farqi yo'q, asosiysi futbol o'ynash kerak. Bugun jamoamiz yigitlari chindan yaxshi harakat qilishdi.

- Aytingchi, "Istiqlol" jamoasining avvalgi tarkibi saqlanib qolinganda bugun boshqacha o'yin bo'lishi mumkinmidi? Masalan jamoasini 7 nafar asosiy tarkib futbolchilari tark etishdi...
- Albatta, boshqa o'yin bo'lardi. Lekin biz birinchi davrada ham "Istiqlol" bilan o'ynab, mag'lubiyatga uchratganmiz. Futbolda hamma narsa bo'lishi mumkin. Bu sport turida oldindan biron narsa deyish qiyin.

- "Neftchi" navbatdagi turni safarda o'tkazadi. "Zomin" jamoasiga qarshi bo'lib o'tadigan o'yin haqida nimalarni ayta olasiz?
- Bu o'yinga ham doimgidek tayyorgarlik ko'ramiz. Tayyorgarlik qancha yaxshi bo'lsa, natija ham shunga mos bo'ladi.

Bekzod Tolibov yozib oldi