"2+1" qayd etgan hujumchi, tur golini urgan yosh xavbek, jamoasini muqarrar gollardan qutqargan darvozabon - Superligada 13-turning eng yaxshilari

Championat.asia sayti talqiniga ko'ra 13-turning eng yaxshi darvozaboni – Shohruh Eshbo'taev ("Sho'rtan")

"Sho'rtan" bu tur G'uzorda "Surxon"ni qabul qilib, 2:1 hisobida g'alabaga erishdi. Ushbu g'alaba qo'lga kiritilishida mezbonlar posboni Eshbo'taevning o'rni beqiyos. U uchrashuv mobaynida, ayniqsa, birinchi bo'limda ko'plab vaziyatlarda jamoasini gollardan asrab qoldi. Birga-bir vaziyat deysizmi, murakkab zarba deysizmi, hammasida qutqardi. Bahs davomida 8 ta seyv namoyish etganining o'zi barchasini anglatib turibdi. Shunday qilib, Shohruh Eshbo'taev Championat.asia talqinida 13-turining eng yaxshi darvozaboni deya etirof etildi.

Championat.asia sayti talqiniga ko'ra 13-turning eng yaxshi murabbiyi – Ilyos Zeytullaev ("Bunyodkor")

"Bunyodkor" ushbu turda Samarqandda "Dinamo" maydonida mehmon bo'ldi. Jamoa stadion to'la muxlislar qarshisida mezbonlarni yirik hisobda taslim etdi (3:0). Ilyos Zeytullaev Vadim Abramovning "Dinamo"sini ipidan ignasigacha o'rganib chiqqani yaqqol sezildi. Uning shogirdlari dastlabki daqiqalardanoq uchrashuvda dominantlik qilib, mehmondan 3 ochko olib ketishga astoydil harakat qildi va shunga yarasha niyatiga etdi. Shu tariqa, safarda musobaqa yuqori pog'onalarida borayotgan "Dinamo"ni mag'lub etgan Ilyos Zeytullaev Championat.asia talqiniga ko'ra 13-turning eng yaxshi murabbiyi deb topildi. 

Championat.asia sayti talqiniga ko'ra 13-turning eng yaxshi futbolchisi – Temurxo'ja Abduxoliqov ("Bunyodkor")

"Bunyodkor" bu turda Samarqandda "Dinamo"ni taslim qildi (3:0). Uchrashuvda tajribali hujumchi Temurxo'ja Abduxoliqov har taraflama ajralib turdi va jamoasining barcha gollarida bevosita qatnashdi. U dublni rasmiylashtiribgina qolmay, uchinchi golga pas ham uzatdi. "Qaldirg'ochlar" sardori so'zsiz va hech bir so'rovnomasiz Championat.asia talqinida 13-turning eng yaxshi futbolchisi bo'ldi.

Championat.asia sayti talqiniga ko'ra 13-turning eng chiroyli goli muallifi – Nosirjon Abdusalomov ("Bunyodkor")

"Bunyodkor" bu turda "Dinamo" maydonida zafar quchganidan xabaringiz bor. 47-daqiqada yosh yarim himoyachi Nosirjon Abdusalomov tomonidan kiritilgan to'p o'ziga xosligi bilan etiborni jalb qildi. Golda Abduxoliqov to'pni unga qulay tarzda yumalatib berdi, u esa chamasi 11 metrdan darvozaning o'ng tomonini nishonga oldi. Shunday qilib, 21 yoshli xavbek Abdusalomov Championat.asia sayti talqinida turning eng chiroyli gol muallifi deb topildi.