ХХI асрда ким кўпроқ жарима зарбаларидан тўп киритган? Ажабланарлиси, иккинчи ўринда дарвозабон, Месси ҳатто кучли учликка ҳам киролмаган

2000 йиллардаги "Лион" афсонаси бўлган бразилиялик Жуниньо Пернамбукано 74 та гол билан биринчи ўринни эгаллади. Ҳозирда 30 ёшдан кичик бўлсангиз ҳам, Жуниньонинг сеҳрли зарбаларининг видеоларини кўрган бўлсангиз керак, у деярли ҳар ҳафта гол урарди. Шуни ёдда тутингки, бу сеҳргар ўз фаолияти давомида жаримадан 118 та гол урган, яъни стандартларнинг 60% дан кўпроғи дарвоза тўрига бориб тушган.

"Дарвозага зарба беришда доим моҳир бўлишга интилганман, лекин болалигимда жарима зарбаларидан гол уриш учун кучим етмасди. 13 ёшгача футзал билан шуғулланганман, кейин жарима зарбаларини тепишни бошладим. Аммо жонли девор жуда яқин туюларди, гол уриш эса мураккаб эди. Моҳирона зарба бериш техникасини фақатгина Францияда ўрганганман", — дейди бразилиялик футболчи.

Иккинчи ўринда тарихдаги энг сермаҳсул дарвозабон, "Сан Паулу"нинг буюк посбони Рожерио Сени 59 гол билан ўрин эгаллаган. 

Учинчи ўрин ҳам бразилияликларга тегишли — Роналдиньо клубдаги фаолияти давомида жарима зарбаларидан 55 та гол урган.

Лео Месси қани деган савол туғилиши табиий. У ҳозирча 50 та гол билан тўртинчи ўринни эгаллаб турибди. Агар ПСЖда Лео мерганлик қобилиятини қайтара олса ва "Барселона"даги каби яна гол ура бошласа, у фаолиятининг қолган қисмида иккинчи ўрингача мумкин, аммо Жуниньонинг рекордини забт этиш деярли иложсиз.

Мессидан кейинги ўринни Криштиану Роналду эгаллаб турибди, унда жаримадан 47 та аниқ зарба бор. Криш охирги марта 2020 йилда "Ювентус" либосида жарима зарбасини аниқ амалга оширган, шундан бери у 50 дан ортиқ муваффақиятсиз уриниш қайд этган.

Рўйхатда Дэвид Бекхэм, Алессандо Дель Пьеро ва Роберто Карлос каби жарима зарбаси даҳолари билан ҳам мавжуд. Ҳозирги футболчилар орасида ўтган ёзда машмашали тарзда "Милан"дан "Интер"га кўчиб ўтган плеймейкер Хакан Чалханоглу алоҳида ажралиб туради. Янги клуби сафида у ҳали стандартдан гол ура олмади, аммо "Милан"да 4 та жарима зарбасини аниқ ижро этганди. Шунингдек, Хакан "Байер" либосида 9 марта тўпни жонли девор устидан оширган ҳолда ўзи чамалаган мўлжалга йўллай олган.

Рўйхатда Кристиан Эриксен ҳам бор. Даниялик футболчининг жарима зарбаларидан 16 таси аниқ чиққан, улардан 12 таси "Тоттенхэм" сафида амалга оширилган.

О.А