Улуғбек Бакаев "Бухоро"даги фаолиятини давом эттирадими?

Бу ҳақда клуб матбуот хизмати маълум қилди.

"Сўнги пайтларда ижтимоий тармоқлар орқали жамоамиз бош мураббийи Улуғбек Бакаевнинг тақдири борасида кўплаб хабарлар тарқалди. "Бухоро" ушбу ҳолат бўйича қуйидагиларни маълум қилади.

Жамоамизнинг турнир жадвалидаги ҳозирги ҳолати мухлисларимизни хавотирга солаётгани бор гап. Шу ўринда, чемпионатдаги ўйинлар ҳали олдинда эканлиги ва яқин таъқибчилар билан орадаги фарқ катта эмаслигини инобатга олиб, жамоамиз раҳбарияти Улуғбек Истамовичга ишонишда давом этади. Бундан ташқари, клуб ва мураббийлар штаби ўртасидаги муносабатлар ижобий кўринишда эканлигини маълум қиламиз. 

3 май кунига белгиланган "Машъал"га қарши ўйинда жамоамизни Улуғбек Бакаев тайёрламоқда. Вакилларимиз мазкур баҳсда фақат ва фақат ғалаба учун майдонга тушади", – дейилади клуб расмий муносабатида.

Аввалроқ мутахассис Суперлига 7-туридан ўрин олган "Навбаҳор" – "Бухоро" (3:0) беллашувидан кейин раҳбариятдан истеъфо сўраган эди.