Тоҳир Кападзе: "ПФЛ Кубогидаги иштирокимиздан кўнглим тўлди"

Бу йил ўз олдига элитага чиқишни мақсад қилиб қўяётган қўқонликлар айрим мутахассисларда ҳам ёмон таассурот қолдирмади. Жамоа бугун биринчи лиганиг янги вакили Тошкентнинг Обод жамоаси билан ярим финалда рўбару келди ва асосий дақиқаларда дурангга имзо чекиб, пенальтилар сериясида рақибга имкониятни бой берди. Баҳс поёнига етгач, "Қўқон-1912" бош мураббийи Тоҳир Кападзенинг ўйин ҳақида фикрларини билишга қизиқдик.

- Учрашув тенг курашлар остида ўтди. Рақиб жамоа менда яхши таассурот қолдирди. Таркибида асосан ёшлар бўлишига қарамай, астойдил ўйнашди. Шогирдларим эса жисмоний жиҳатдан бироз чарчаб қолганди. Чунки бундан олдин, "NBU-Осиё"га қарши кечган баҳсда кўп куч сарф этилганди. Қолаверса бугунги учрашувда икки нафар асосий ўйинчимиз  Александр Критинин билан Азиз Тўхтабоевнинг ўйнамагани ҳам бизга бирмунча қийинлаштирди. Умуман олганда ўйиндан кўнглим тўлди. Негаки, асосий вақтларда даврозамиздан тўп ўтказиб юбормадик. Пенальтилар серияси эса бу  лоторея. Унда дарвозабонга айбни тўнкаш яхши эмас. Йигитлар бор кучларини бериб ўйнади. Афсуски финалга чиқа олмадик.

Лекин бундан ортиқча ташвишга тушиб бўлмайди. Чунки ПФЛ Кубоги турнири мавсум бошланишидан олдин ҳар бир жамоага тайёргарлик босқичидир. Ўйин амалиётни ошириш мумкин.

- Билсангиз керак, бу турнир анъанавий мақомига эга бўлсада, "Қўқон-1912" илк бор бу йил иштирок этди. Шунга қарамай ярим финалга қадар бўлган йўлни босиб ўтдик. Албатта буни ижобий баҳоласа бўлади. Юқорида айтиб ўтганимдек, муҳим ўйинлар ҳали олдинда. Асосийси чемпионатда ғалабаларга эришиш ва ўз олдимизга қўйилган вазифани уддалашимиз керак.

Исломбек Рустамбеков.