Сергей Кучеренко: "Ҳомийлардан, футболимиз мутасаддиларидан "Насаф" тақдирига бефарқ бўлмасликларини сўраб қоламан"

"Авваламбор Рўзиқул Бердиев бошчилигидаги мураббийлар штабига, футболчиларимизга ҳозирги қийин вазиятга қарамасдан ўз фаолиятларини олиб бораётганлари учун ўз миннатдорчилигимни билдираман ва уларнинг меҳнатларини қадрлайман. Ҳозирги кунда пандемия туфайли нафақат бизда балки бутун дунёда ҳам қийин вазият. 

Шундай мураккаб ҳолатда ҳам бизга ишонган, қўллаб-қувватлаб турган жамоамизнинг содиқ мухлисларига ҳам алоҳида ташаккур деб қоламан. Қанчалик қийин бўлмасин ҳозирги кунда ҳам клубимиз ўз фалсафаси асосида фаолиятини давом эттирмоқда. Шу кеча кундузда миллий ҳамда ёшлар терма жамоасига тўққизга яқин футболчиларимиз жалб қилинди. Бундан ташқари "Насаф" футбол клубининг ўттизга яқин тарбияланувчилари турли ёш тоифасидаги терма жамоаларга номзод ҳисобланади. Бу футболчилар нафақат «Насаф» жамоасини балки Ўзбекистоннинг шаънини халқаро майдонларда ҳимоя қилишади. Агар клубимизга бўлган эътибор сусаймаса жамоамиз терма жамоаларга футболчиларни етказиб беришни кўпайтирса кўпайтирадики, асло тўхтатмайди. 

Ҳомийлардан, спорт, хусусан футболимиз мутасаддиларидан Республикада ҳар томонлама ўз ўрнига эга бўлган жамоамиз тақдирига бефарқ бўлмасликларини сўраб қоламан. "Насаф"дек ўз тарихи ва ўз фалсафасига эга бўлган клубнинг инқирози ўзбек футболи учун жуда қимматга тушиши мумкин” — дейди Сергей Кучеренко.

Реклама