Мирко Еличич: "Сўнгги икки ҳафтада бешинчи ўйинимизни ўтказяпмиз. Суперлигага чиқиш вазифаси йўқ"

"Қийин ўйин бўлишини билардик. Бугунги баҳс тақвимимиздаги энг қийин учрашувдек кўринмаслиги мумкин, аммо ҳаттоки Суперлига клублари ҳам ушбу майдонда ўйнашга қийналишади. Ўйин учун "Арал"га раҳмат. Бизнинг ёш футболчиларимиз шундай ўйинлар орқали ўсишга эришади. Намойиш этган ўйинимиз менга ёқди, бироз омад ҳам кулиб боқди, дея оламан. Ўтган ўйинларда ёрдамга келмаган омад, бугун бизга томонда бўлди" - деди Мирко Еличич бугунги тўқнашув ҳақида.

- Иккинчи бўлимда жамоангиз кўпроқ ҳимояланди ва кўпгина вазиятларда вақтни чўза бошлади...
- Мен фикрингизга қўшилмайман. Бу сизнинг фикрингиз ва хоҳлаганингизча фикрлашингиз мумкин, албатта. Ўзбекистонда вақтни чўзадиган клублар жуда кўп. Менинг жамоам ҳеч қачон  бундай ўйнамайди. Сиз қачондир мен футболчиларимга вақтни чўзиш кераклигини айтганимни кўрганмисиз? Футболчилар ўйин давомида жароҳат олди, бу эса футболдаги табиий ҳол.

Биз сўнгги икки ҳафтадаги бешинчи ўйинни ўтказяпмиз ва учрашувларнинг деярли барчаси сунъий майдонда ўтказилди. Бу футболчиларнинг соғлиғига таъсир қилади. Бу нормал ҳолат эмас, шу сабабли футболчиларимдан миннатдорман.

- "Олимпик" жамоасининг таркиби асосан 2005-2006 йилда туғилган футболчилардан иборат. Жамоанинг жорий мавсумдаги мақсадлари қандай?
- Таркибимизда ёшлар кўп. Ушбу футболчилар келажакда Суперлига клубларида фаолият юритишлари керак. Суперлигага чиқиш вазифаси йўқ. Биз футбол ўйнашимиз керак. Таркибимизда ёшлар терма жамоасида ўйнайдиган футболчилар ҳам бор. Ёшлар терма жамоасидан жой олмаган ўйинчиларнинг маҳоратини яхшилашимиз керак. Бир-икки ёши катта футболчилар ҳам бор. Улар бошқа клубларга ўтишмади, энди эса бизга ёрдам беришмоқда. Асосий вазифамиз футболчиларни тарбиялаш.