Марсело Бьелса: "Ўзбекистон ЖЧда иштирок этишининг ўзи катта натижа деб биламан. Ушбу йиғинда ҳар бир футболчининг имкониятларини кўриб олишимиз керак" (матбуот анжумани)

"Эртага жуда қизиқарли ўйин бўлади. Малайзияда бўлиб турганимиздан жуда хурсандман", - деди Марсело Бьелса. --

"Икки ўртоқлик учрашувини кутяпмиз. Малайзия - ажойиб давлат экан", - дея фикр билдирди Родриго Салазар. 

- Уругвайни Доминикан Республикаси ва Ўзбекистонга қарши ўйин кутиб турибди. Икки рақиб ҳақида нималар дея оласиз? Ўзбекистон ўз тарихида илк бор мундиалга чиқди ва яқиндагина Фабио Каннаварони бош мураббий этиб тайинлади...

- Ўзбекистон жаҳон чемпионатида иштирок этишининг ўзи катта натижа ва сабаб. Доминикан Республикасида эса хорижда ўйнайдиган футболчилар кўп. Айниқса Европанинг муҳим лигаларида. Биз эса ушбу жамоаларга қарши юқори даражадаги ўйинимизни намойиш этишимиз кераклигини англатади. Ўзбекистон мундиалга борадиган жамоа. Бу катта натижа. Доминикан Республикаси эса йўқ. Икки мамлакат ўртасидаги фарқ шу. Икки рақиб ҳам бизга жиддий қаршилик кўрсатади.

- Терма жамоанинг асосий футболчилари саналган Хосе Мария Хименес ва Дарвин Нуньеслар жароҳат туфайли ушбу йиғинга чақирилмади. Родриго Бентанкур, Мануэль Угарте ва Федерико Вальверде каби етакчи футболчилар Малайзияга олиб келинмаганинг сабаби нима?

- Ушбу ўйинчиларни терма жамоага жуда керакли деб ҳисоблайман. Ҳозир эса биз кўп янги футболчиларни терма жамоага жалб этдик ва уларга имконият бериб кўрамиз. Яна бир бор такрорлайман, мундиал яқинлашиб келаётгани сабабли терма жамоага чақирилиши керак бўлган ва жаҳон чемпионатига олиб бориладиган таркибдан ўрин олиши мумкин бўлган ҳар бир футболчига имконият бериб кўришимиз керак. Ҳар бир футболчининг ўйинини кўриб олишимиз керак. Сабаби биз йиғинга чақирилаётган ҳар бир футболчи 2026 йилнинг июнь ойида Уругвай терма жамоаси сафидан ўрин олиши мумкин.

- Cиз ишлаган жамоалар ҳар доим юқори интенсивлик ва жисмоний жиҳати билан ажралиб туради. Уругвай терма жамоасидаги футболчилар сизнинг фалсафангизга қанчалик мос келди?

- Икки йилдан бери Уругвай футболидаман. Барча футболчилар мундиалдан олдинги тайёргарлик жараёнидан ўтишмоқда. Ҳозирги йиғинларда биз ўзимизнинг услубимизни яхшилаш билан бандмиз.

- Кике Оливейра терма жамоа йиғинида иштирок этмайдиган бўлди. Бундай қарорга келишингизга нима сабаб бўлди? Ушбу қарордан сўнг Оливейра терма жамоа таркибидан тўлиқ тушиб қолиши мумкинми?

- У терма жамоага чақирилиши мумкин бўлган футболчи. Ҳозирги кунда ҳеч қайси футболчининг ЖЧда иштирок этиши аниқ эмас. Ҳеч ким таркибдан тушиб қолгани ёки таркибда бўлиши аниқ эмас.

Родриго Салазарга савол

- Малайзия иқлими сизларга қанчалик қийинчилик туғдирмоқда? 

- Мамлакат бироз иссиқ экан. Бироқ биз футболчилар бир неча кундан бери машғулот олиб бормоқдамиз ва деярли ўрганиб бўлдик.

Родриго Салазарга савол

- Марсело Бьелса жуда машҳур ва тажрибали мураббий. Ушбу мутахассисдан нималарни ўргандингиз?

- Бьелсадан имкон қадар кўпроқ нарса ўрганиб олишга ҳаракат қиламан. Уругвай терма жамоасида фаолият олиб юбораётгани катта ютуғимиз. Ҳар бир футболчи терма жамоада имкон қадар яхшироқ ўйин кўрсатишга ҳаракат қилади.

Эслатиб ўтамиз, Ўзбекистон – Уругвай учрашуви 13 октябрь куни Малайзиянинг Малакка шаҳридаги "Ханг Жебат" стадионида бўлиб ўтади. Учрашув Тошкент вақти билан 17:45 да бошланади.