Эльман Тагаев: "Нефтчи"га келишдан олдин етарлича маълумотга эга эдим"

Бу туркманистонлик Эльман Тагаевдир. 1989 йили Туркманистонда туғилган футболчининг шу кунга қадар маҳаллий Ашхаобод ва Озарбойжоннинг Азал клубларида ўйнагани ҳақида маълумотлар бор. Мурод Исмоилов ушбу ярим ҳимоячини Ҳоким Кубоги-2014 баҳсларида синаб кўрмоқда. Куни кеча Фарғонага қилган сафаримиз чоғида Тагаев билан қисқача суҳбатлашдик.

- Эльман, аввало Фарғонага хуш келибсиз. Айтингчи, "Нефтчи" йиғинига қўшилишингиз қай тариқа амалга ошди?
- Бу ерга мен ўзбекистонлик футбол агенти Шариф Умаров орқали келдим. Ҳозирча кўрикдан ўтмоқдаман.

- Жамоа сизда қандай таассурот қолдирди?
- Менга ёқди. Йигитларнинг бир-бирига бўлган муносабатлари аъло даражада экан. Илк кунимданоқ мени яхши кутиб олишди. Қисқача айтганда, янги муҳитга мослашиб олишда ортиқча муаммога дуч келмаяпман.

- Билсангиз Туркманистондан кўплаб ҳамюртларингиз ҳар йили бизнинг чемпионатда ўзларини синаб кўришади. Олдингизда "Нефтчи" варианти пайдо бўлганида, бирорта ҳамюртингиздан клуб ҳақида сўрадингизми?
- Ҳа, албатта. Ўзбекистон клубларида ўйнаётган туркманистонлик футболчилар билан аълоқаларим яхши. Фарғонага келишдан олдин интернет орқали ҳам "Нефтчи" хусусида етарлича маълумотга эга бўлдим.

- Сир бўлмаса, айни пайтда юртимиздаги клубларда ўйнаётган қайси футболчилар билан гаплашиб турасиз?
- Агарда ҳамюртларимни назарда тутаётган бўлсангиз, шуни айтишим мумкинки, Артур Геворкян ва Мақсатмурод Шомуродов билан доимий аълоқаларим мавжуд. Улар билан ҳам бу борада маслаҳатлашдим. Иккиси ҳам "Нефтчи" ҳақида илиқ фикрларни айтишганида, нарсаларимни йиғиштирдимда, юртингиз томон отландим.

- Юқорида "Нефтчи" менга ёқди деб айтдингиз. Бу жамоада қолиш имкониятингизни неча фоизга баҳолайсиз?
- Тўғрисини айтсам, бу борада аниқ бир нима дея олмайман. Бу ерга кўрикдан ўтиш учун келдим. Имкон қадар "Нефтчи"да қолиш учун мен ўзимдан ижобий таассурот қолдиришга харакат қиламан. Қолгани мураббийга боғлиқ.

Исломбек РУСТАМБЕКОВ суҳбатлашди.