Элдор Мойлиев: "Яккакурашларда ютқазсангиз, ҳеч қанақа тактика ёрдам бермайди"

- Аввало ўйин ҳақида фикрингиз?

- Биринчи бўлимни яхши бошладик, гол ҳам урдик, назорат ўз қўлимизда эди. Аммо афсуски, ўз хатомиз туфайли тўпни йўқотиб гол ўтказиб юбордик. Биз учрашувдан аввал йигитларга айтгандик, "Бухоро" стандарт вазиятларда яхши ҳаракат қилади деб. Рақиб иккинчи голни уриб олгач, чуқур ҳимояланди, бу эса бизга қийинчилик туғдирди.

- "Шўртан" голдан сўнг нега ўйинни сусайтирди?

- Тўғри айтдингиз, голгача жуда яхши ўйнаб тургандик, лекин нимагадир тўп киритганимиздан сўнг бироз пасайиб қолдик. Яккакурашларда ҳам ютқаздик. Ҳозирги футбол кўп куч талаб қилади, агар сиз яккакурашларда ютқазсангиз, ҳеч қанақа тактика фойда бермайди.

- "Шўртан"да ёш таркиб ўйнаяпти. Шу ҳақда нима дея оласиз?

- Ўйиндан ўйинга вақтимиз кам бўляпти. Шу боис кўнгилдагидек тайёргарлик кўра олмаяпмз. Ёшларга ҳам эътибор беряпмиз, фақат вақт керак. Ҳимоядан чиқишда ҳам, ҳужумни ривожлантиришда ҳам машғулотда синаб кўрганларимиз бугун ўхшамади.