Болалар футболи. Қашқадарёликлар кумуш медалларига эга бўлишди

Ўзбекистон Республикаси жисмоний тарбия ва спорт вазирлиги ҳамда Ўзбекистон футбол ассоциацияси ҳамкорлигидаги мазкур кубок беллашувлари Қорақалпоғистон Республикаси (2004 йилда туғилганлар), Фарғона (2003 йилда туғилганлар), Навоий (2005 йилда туғилганлар), Жиззах (2006 йилда туғилганлар) ва Самарқанд (2007 йилда туғилганлар) вилоятларида ташкил этилди. Хусусан, Қашқадарё вилояти футбол маҳорат мактаби ўқувчилари ҳам ушбу мусобақаларда фаол иштирок этиб, медалларни жамғаришга эришди. Жумладан, Фарғонада 2003 йилда туғилган футболчилар ўртасидаги мусобақада қаршиликлар финалга қадар етиб борди. Тренерлар Жонибек Эгамбердиев ва Константин Боев шогирдлари финал босқичида мезбонларга 0:2 ҳисобида ғолиблик имкониятини бой берган бўлишсада, иккинчи ўринни эгаллаб, кумуш медалларга эга чиқишди. Учинчи ўринлар Бухоро ва Жиззах вилояти жамоаларига насиб этди. Беллашувлар сўнггида Қашқадарё жамоаси “Энг яхши тартибли жамоа” дарвозабони Жасур Ражабов “Энг яхши дарвозабон”, ҳужумчиси Асадбек Самариддинов “Энг яхши турнир тўпурари” номинацияларини қўлга киритишди.

Жиззах шаҳри мезбонлик қилган 2006 йилда туғилган футболчилар ўртасидаги баҳсларда ҳам Қашқадарё жамоаси кумуш медалларни қўлга киритишга муваффақ бўлишди. Жиззахликлар билан ўтган финал учрашувида тажрибали тренер Баҳриддин Омонов шогирдлари 3:4 ҳисоби билан иккинчи ўринни банд этишди. Жамоа ҳужумчиси Ғанишер Қодиров эса “Турнир тўпурари” номинациясига лойиқ кўрилди. Натижаларга кўра бронза медаллари Тошкент вилояти ва Ташкент шаҳри жамоаларига берилди. Ушбу мусобақада Қашқадарё вилоят футбол маҳорат мактабининг спорт ишлари бўйича директор ўринбосари Насим Шойимов ҳам иштирок этиб, жамоасинининг техник ва тактик маҳоратларини кузатиб борди. Шунингдек, Қашқадарё жамоаси беллашувлар доирасида бўш вақтларини мазмунли ўтказиш мақсадида Жиззах шаҳридаги Ҳамид Олимжон ва Зулфия номидаги ихтисослаштирилган мактаб-интернати ва уй музейида ҳам бўлишди.

- Ўзбек халқининг атоқли фарзандлари – шоир, драматург, публицист ва жамоат арбоби Ҳамид Олимжон ва унинг рафиқаси – севимли шоирамиз, садоқат тимсоли Зулфия ижоди билан ўқувчиларимизни яқиндан таништириш имконияти туғилганидан хурсандмиз, - дейди Қашқадарё вилоят футбол маҳорат мактабининг маънавият – маърифат ишлари бўйича директор ўринбосари Шавкат Рўзиев. – Ташрифдан кўзланган мақсад - ёшларимизнинг бу икки севимли шоирларимиз ҳаёт ва ижод йўллари билан яқиндан танишиш ва шу орқали ўқувчиларимизнинг маънавий онгини юксалтириш, адабиётга, китобхонликка бўлган меҳрини кучайтиришдан иборат бўлади.

Илҳом РАҲМОНОВ тайёрлади