Баҳром Ҳайдаров: "Навбаҳор" каби жамоага қарши ўйинда 0:3 ҳисобидан кейин ўйинга қайта олиш жуда қийин"

"Навбаҳор"ни бугунги чиройли ғалаба билан табриклайман. Мухлисларимиздан узр сўрайман. Рақибимиз дастлабки 20 дақиқада тезкор футбол намойиш этди. Биз ҳам бунга тайёр эдик, аммо буни эплай олмадик. Одилов ва Жияновлар кўп хавф туғдириши билардик. Бугун уларни тўхтатиб қола олмадик. Иккинчи бўлимда эса вазиятларимиз бўлади деб ўзгаришлар қилдик. Кейин эса пенальти ва 3:0 ҳисоби. Шунга қарамай футболчилар охиригача курашди. Имкониятларимиздан фойдаланишимиз учун бироз маҳорат етишмади. Вазиятларнинг 50%дан фойдалансак, натижа бошқача бўлар эди" - дея фикр билдирди Баҳром Ҳайдаров бугунги баҳс ҳақида.

- Жиянов ва Одилов ҳақида гапирдингиз. Сизнинг жамоангизга шундай тезкор вингерлар етишмаяпти?

- Тезкор вингерларни бошқа жамоалар олиб қўйди. Биз Суперлигага энди қайтдик ва биздек жамоалар футболчиларни ўз сафига қўшиб олишда қийналишади. Насиб қилса, Суперлиганинг "ишончли" иштирокчисига айлансак, Одилов ва Жиянов каби маҳоратли футболчиларни сафимизга жалб эта оламиз. Биз янги жамоа туздик. Ҳали ўзгаришлар ҳам бўлади. 

- Қўқон шаҳри ҳокимлиги жамоадан қанчалик эътибор қаратмоқда? 

- Кўпчиликка маълум бўлса керак, бизнинг жамоада асосий ҳомий йўқ. Вилоят ҳокими имкон қадар ёрдам бериб келмоқда ва ҳомий излаш жараёнида. Раҳбарларимиз Суперлигага чиқиш мақсадини қўйишган ва имкон қадар ёшларни ўйнатиш мақсади қўйилган эди. Таркибимиздаги ёшлар эса ҳар доим ҳам барқарор ўйин намойиш эта олишмаяпти. Бунга 2-3 йил вақт керак. Мисол учун, "Сурхон" ва "Сўғдиёна" каби клублар ёшлардан иборат яхши таркиб туза олган ва Суперлигада муносиб иштирок этиб келмоқда. Келажакда академия ва базани ишга тушириш мақсадимиз бор. Жорий мавсумда майдон ва машғулот майдонини таъмирлаш учун ҳам катта маблағ сарфланди. Раҳбарлар жамоага эътибор беришни истамоқда. Ўзингиз биласиз, Қўқон шаҳри мамлакатимиз футболининг ватани ҳисобланади. Халқни хурсанд қиладиган жамоа яратишимиз керак. Ҳар доим ҳам режамиздагидек бўлмаяпти, сўнгги учта турда ютқаздик. Қийин вазиятлардан бирдамлик билан чиқиб кета олган жамоа кучли ҳисобланади.

- "Қўқон-1912" иккинчи голни жуда тез ўтказиб юборди. Ушбу гол жамоанинг ўйинга тайёрлаган режасига қанчалик таъсир қилди?

- Ўйинни кейинчалик ҳам таҳлил қилиб кўриб чиқаверамиз. Ҳозир эса дастлабки ҳиссиётим билан бўлишсам. Стандарт вазиятлар устида кўп ишлаймиз, аммо биринчи ва иккинчи гол оралиғи жуда кам бўлди. Кейин эса учинчи гол. "Навбаҳор" каби жамоага қарши ўйинда 0:3 ҳисобидан кейин яна ўйинга қайта олиш жуда қийин.