Артур Юнусов: “Биринчи галдаги вазифа – гуруҳдан чиқиш”

Ўзбекистон миллий терма жамоаси эртага гуруҳдаги илк учрашувни ён қўшниларимиз – Қирғизистон терма жамоасига қарши ўтказади. Баҳодир Аҳмедов шогирдлари қитъа чемпионатига сўнгги тайёргарликни Хитойда ташкил этишди ва яхши кайфият билан Вьетнамга етиб келишди. Биз бугунги ўйин олдидан терма жамоа етакчи футзалчиларидан бири Артур Юнусов билан боғланиб, унинг фикрини ёзиб олдик.



Cуратда - (ўнгдан чапга) Артур Юнусов, Николай Одушев (катта мураббий), Андрей Шлема (Хошиминдаги гипермаркетда харид қилишга ҳам улгуришди)

“Гуруҳдан ортиқча қийинчиликсиз чиқишимиз керак. Терма жамоамиз олдига қўйилган биринчи галдаги вазифа – гуруҳда биринчи ўринни эгаллаб, чорак финалга чиқиш. Гуруҳдаги жамоалар билан шу пайтгача бир неча маротаба тўқнаш келганмиз ва аксарият ўйинларда ғалаба қозонганмиз. Ҳозирги шароитда ҳам гуруҳ фаворитимиз. Энг муҳими, ўйинимиз чиқса бўлгани.

Осиё чемпионати ҳар икки йилда бир маротаба ўтказилади. Қитъа чемпиони бўлишни ким ҳам истамайди, дейсиз? Шахсан бизнинг жамоамизда қитъа чемпиони бўлиш истаги юқори. Чунки шу пайтгача ҳали чемпионлик шохсупасига кўтарилмаганмиз.

Ҳозир Хошиминда об-ҳаво булутли. Ёмғир бир ёғяпти, бир тиняпти. Шу иқлимни инобатга олган ҳолда Хитойда бир ҳафтага яқин вақт давомида тайёргарлик кўрдик. Лекин ёпиқ мажмуада ўтказиладиган ўйинларда об-ҳавонинг деярли таъсири бўлмайди. Ҳаммаси ўз қўлимизда. Мухлисларни хушнуд этишга астойдил ҳаракат қиламиз”, - дейди Юнусов.

Камолиддин АЛИМОВ ёзиб олди