Ҳамюртларимиз кеча "Галатасарой" ёшлари билан дуранг ўйнашган. Олдинда "Фенербаҳче" тарбияланувчилари билан учрашув кутиб турибди...

Бунга одатий назорат баҳси сифатида қарашингиз мумкин. Лекин мазкур учрашувлар Туркияга олиб кетилган 15 нафар футболчи учун улкан, ҳатто ундан ҳам каттароқ имконият аслида. Улар айни пайтда маҳаллий скаутлар назарида бўлиб туришибди.

Туркия тарихидаги энг яхши футболчиларнинг аксари 10-12 ёшларида катта жамоалар томонидан кашф қилинган. Масалан, Эмре Белозўглу 11, Арда Туран 12 ёшда "Галатасарой"га трансфер бўлган эди. Уларнинг кейинги фаолияти ҳаммага маълум. Эмре А Серия, АПЛ ва Ла Лигада юқори савияда ўйин кўрсатган бўлса, Ардадан "Атлетико" билан ЕЧЛ финали ва "Барселона" либосидаги илиқ хотиралар қолди.

Сўнгги йилларда Туркия топ-5 лигаларга ўтиш ва футболчи сифатида ўсиш учун Россия, Украина ёки Беларусга нисбатан 5-6 марта яхшироқ трамплин бўлиб қолди. Буни трансферлар кўламидаги фарқдан англаб олиш мумкин.

Масалан, бир йил олдин "Фенербаҳче"нинг асосий таркибига қўшилган 16 ёшли Арда Гулер мавсум давомида 12 ўйинда 3 та гол урди. Унинг трансфер қиймати 1 йил ичида 60 марта ўсди ва айни пайтда Италиядаги Шомуродов билан деярли бир хил баҳоланяпти. Шунингдек, Арда Турк Суперлигасидаги ўйинлари орқали ПСЖ, "Барселона" ва "Арсенал"нинг радарига тушишга ҳам улгурди.

Хуллас, Туркияда катта футболчи бўлиш учун катта имкониятлар бор. Аммо бу ёшда маҳаллий академияларга трансфер бўлиш учун сиз ростакам вундеркинд бўлишингиз керак...

1993 йил. "Галатасарой" 11 ёшли Эмре Белозўглуни трансфер қилгани тўғрисидаги хабар. Бу болакайни 8 йилдан кейин "Интер" харид қилади.

Туркия — ажойиб имконият