Тожикистонинг «Истиқлол» клубига янги бош мураббий тайинланди

Бугун клуб офисида Виталий Левченко билан 2020 йил охирига қадар шартнома имзоланди. Мураббий олдига клуб иштирок этадиган барча мусобақаларда энг олий мақсадлар қўйилган. «Истиқлол»да Виталий Григорьевичга Алишер Тўхтаев, Анвар Норқулов ва дарвозабонлар мураббийи Фарруҳ Бердиев ёрдам беради.

Виталий Григорьевич Левченко – 1972 йилнинг 23 март куни Хўжандда туғилган. Футболчи сифатида Украинанинг «Динамо» ва ЦСКА, Симферополнинг «Таврия», Россиянинг «Волгарь» (Астрахань), «Спартак» (Кострома), «Динамо» (Ставрополь), «Урал» (Екатеринбург) ва Хитойнинг «Чаньчунь Ятай» клубларида тўп тепган. Тожикистон терма жамоаси сафида 10та ўйин ўтказган.

Украинанинг «Княжа» (Борисполь вилояти), «Еднисть» (Чернигов вилояти), «Десна» (Чернигов) клубларида Украина ёшлар терма жамоаси ёрдамчиси, Тожикистон терма жамоаси бош мураббийи ёрдамчиси, «Баркчи» ва Россиянинг «Крилья Советов» (Самара) клубларида ишлаган. Левченконинг сўнгги клуби «Хўжанд» клуби бўлган эди.

Таъкидлаш лозимки, Левченкода ПРО лицензияси йўқлиги боис Осиё чемпионлар лигасида жамоанинг расмий бош мураббийи Мубин Эргашев эди. Левченко шу йилнинг сентябрь ойида ПРО лицензияси учун ўқишни бошлайди.