Қўқон шаҳрида янги спорт мажмуаси барпо этилди

Бугунги кунда Республикамизнинг қайси гўшасига борманг, бир-биридан чиройли бўлган спорт мажмуаларини кўриб ҳавасингиз келади.

Ўзбек футболининг ватани бўлмиш – Қўқон шаҳрида қад ростлаган яна бир спорт мажмуаси фикримизга исбот бўла олади. Қўқонлик тадбиркор Шавкат Шарипов ўз маблағлари эвазига 1,5 гектар майдонига эга бўлган  “Аҳмадхон” спорт мажмуасини қуриб битказди. Ушбу мажмуа жаҳон стандартларига тўлиқ жавоб берадиган барча қўлайликларга эга эканлигини айтиш ўринли. Бу ерда ечиниш-кийиниш, ювиниш, дам олиш хоналари мавжуд. Ушбу мажмуа Қўқон шаҳри Фурқат кўчаси Ёшлар боғи ҳудудида жойлашган бўлиб, бу ерда бир вақтнинг ўзида 100 дан ортиқ спортчилар шуғулланиш имкониятига эга. Юқори малакага эга бўлган мураббийлар 30 турдан зиёд спорт турлари бўйича машғулотлар олиб боришади.

Ушбу мажмуа Ўзбекистон Республикаси давлат мустақиллигининг 27 йиллиги учун ўзига хос совға десак, муболаға бўлмайди.

— Юртимизда спортга бўлган мана шундай эътиборни кўрган ҳар қандай одам илҳомланиб кетиши аниқ, дейди тадбиркор Шакват Шарипов. – Буларнинг барчаси ҳукуматимиз ва шахсан Президентимизнинг тадбиркорларга кўрасатаётган юксак эътибор ва ғамхўрликларнинг меваси дейиш мумкин. Мақсадим Ўзбекистон спортнинг ривожланиши учун ўзимнинг ҳиссамни қўшиш. Умид қиламанки, мажмуамизда шуғуллаётган спортчилардан келажакда жаҳон ва Олимпиада чемпионлари етишиб чиқади.

Яна шуни қўшимча қилиш керакки, мажмуада 20 кишига мўлжалланган меҳмонхона ва овқатланиш учун ҳам шароитлар яратилган.

Аброр ДЕҲҚОНОВ