Орлов замонавий шарҳловчилар ҳақида: "Нотўғри урғулар қулоққа ғалати эшитилади. Баъзида ўйиндан жуда катта чалғишлар бўлади. Эфирда кераксиз сўзлар кўп бўлмаслиги керак"

"Шарҳловчилар яхшиланди, лекин фамилияларни айтишни хоҳламасдим. Акс ҳолда: "Орлов фалончига қарши" деган сарлавҳалар пайдо бўлади. Бу керак эмас. Мен шунчаки ҳамкасбларимга касбимиз таянадиган ўша учта асосни эслатиб ўтмоқчиман.

Биринчиси – бу рус тили. Сўзлардаги нотўғри урғуларнинг кўплиги қулоққа ёқмайди. Инобатга олинг, шарҳловчилар, сизни филологлар ҳам, рус тили ўқитувчилари ҳам ва, айниқса, болалар тинглашади. Совет телевидениесида барча йўналишлар бўйича жиддий танлов бўларди. Шунинг учун ҳам бошловчилар, дикторлар тўғри гапиришарди. Ҳеч ким хато талаффуз қила олмасди, ҳозир эса ҳатто федерал каналларда ҳам буни тез-тез эшитяпман. Бу Горбачёв давридан бошланган. Михаил Сергеевич кўп гапирарди, лекин рус тилида – ёмон гапирарди. Айтганча, Володя Стогниенконинг рус тили яхши. У ҳозир Okko'да спорт бўйича раҳбар ва ходимларни йўналтириб тургани кўриниб турибди. Ушбу платформа туфайли бизда яна бир гуруҳ қизиқарли шарҳловчилар пайдо бўлди.

Иккинчиси. Футбол репортажи жанри футбол майдонида нима содир бўлаётгани ҳақида гапиришни назарда тутади. Бизда эса баъзида ўйиндан жуда катта чалғишлар юз беради. Табиийки, ҳамма ўйинларга, репортажларга тайёргарлик кўради – баракалла. Интернет кўплаб имкониятларни очмоқда. Лекин совет шарҳловчиларида ҳам қоида бор эди: қисқалик – талантнинг синглиси. Эфирда кераксиз сўзлар (сўз мусори) кўп бўлмаслиги керак. Сен ўйиннинг нозик жиҳатлари ҳақида гапиришга ҳаракат қил – энг муҳими шу!

Учинчи асос – хайрихоҳлик. Мен доимо буюк Николай Николаевич Озеров 1973 йилда менга очиб берган машҳур формулани тарғиб қиламан. ЎҲЖ – ўзаро ҳурмат жамияти. Эфирда шарҳловчилар ўртасидаги бундай муносабат айниқса муҳим. Телевизор қаршисида хушмуомала одамлар ишлаётгани томошабинларга ёқади.

Шубҳасиз, бизнинг ишимизда мавзуни билиш жуда муҳим. Аммо ҳатто хизмат кўрсатган спорт усталари Маслаченко ва Майоров ҳам ҳеч қачон мураббийларга ақл ўргатишга йўл қўйишмаган. Бу тақиқланган иш ҳисобланарди. Бугун мен гўёки тактика нотўғри танланган деган даъволарни эшитсам: "Ўртоқ шарҳловчилар, одоб сақланг, бундай қилиш керак эмас. Сизнинг вазифангиз бошқа – футболни тарғиб қилиш", деб ҳайқиргим келади. "Мазали" вазиятларни илғаб олиш керак, лекин камчиликлар ҳақида ҳам гапириш лозим – айнан ким хато қилганини", – деди Орлов.