Асрор Алиқулов: "Футболчиларнинг матонати эвазига охирги дақиқаларда гол уриб, ғалаба қозондик"

- Ўйин ҳақида

- "Янгиер" жамоасининг бундан олдинги ўйинларини кўриб чиқиб, уларнинг кучли томонлари икки қанот эканлигини билдик ва ўша ҳудудларни ёпишга ҳаракат қилдик. 100 фоиз уддаладик деб айтолмайман, лекин қайсидир маънода уларнинг ҳужумларини тўхтатишга эришдик. Футболчиларнинг меҳнати, матонати эвазига охирги дақиқаларда гол уриб, ғалаба қозондик. Уларга миннатдорчилик билдираман.

- Жамоа трансфер таъқиқи, молиявий қийинчиликлар ва бошқа бир мунча қийинчиликларга учраб, сўнгги поғоналарда бормоқда. Вазиятдан чиқиб кетиш учун "Шўртан"нинг имкониятларини қандай баҳолайсиз?

- Биз жуда кеч йиғилдик, бу молиявий қийинчиликлар билан боғлиқ. Футболчиларнинг жисмоний ҳолатини имкон қадар тезроқ тиклашга ҳаракат қиламиз, чунки олдинда қийин ўйинлар кутиб турибди. 

- Ҳужум чизиғидан кўнглингиз тўляптими?  "Шўртан" 12 ўйинда 4 та гол урди, холос. 

- Ҳужумда асосан, ёш футболчилар ўйнашади. Гол урилиши лозим бўлган вазиятларда барибир маҳорат етишмаяпти. Ўйлайманки, ўйиндан ўйинга кучайиб боришади. 

- Кубок доирасидаги "Қизилқум" – "Шўртан" ўйини ўзаро келишувига кўра Навоийга кўчирилибди. Сафар харажатларини "Қизилқум" қоплаб бериши айтилган. Бу ҳақиқатми? Кўчириш сабаблари ҳақида айтиб ўтсангиз.

- Футболчиларга соат 17:00 да ўйнаш қийин, мана бугун бунинг гувоҳи бўлиб турибмиз. Молиявий томондан ўз уйимизда қабул қила олардик. Аммо ўзаро келишиб, салқинда ва яхши шароитда ўйнаш учун бунга рози бўлдик. Сафар харажатларини қоплаётгани учун "Қизилқум" жамоасига раҳмат айтамиз.