Ўйиндан кейинги матбуот анжуманида "Сурхон" бош мураббийи Анвар Ғофуров иштирок этди.
- Ўйин ҳақида фикрингиз?
- Авваламбор "Каттақўрғон" жамоасини ғалаба билан табриклайман. Ўйинга келадиган бўлсак, менинг хатойим катта бўлди, чунки таркибни ўзим танлаганман. Биринчи таймдаги ўйинимиз умуман ёқмади. Негадир биринчи бўлимда умуман ўйинимиз қовушмади ва футболчилар мен тушунмайдиган футбол намойиш этишди. Таркибда Суперлига учрашувидан кейин ўзгаришларни амалга оширгандик, лекин бу ўзгаришлар ўзини оқламади.
- Кубок баҳси бўлгани учунми негадир жамоангизда иштиёқ кўринмади?
- Бу мен учун ҳам қизиқ. Айниқса биринчи таймда йигитларни таний олмадим. Иккинчи таймда ўн киши қилган ишни 11 киши бажара олмади. Биз бундан-да яхши ўйин кўрсата оламиз. Учрашувни тўлиқ таҳлил қилиб чиқамиз. Ҳар бир футболчи майдонга тушганидан кейин борини бериши керак. Чунки эгнида клуб либосини кийиб ўйнаяпти. Футбол орқасидан ҳаммамиз оила боқамиз, шундай экан ишга масъулият билан қараш керак. Хато ҳаммада бўлади, лекин ҳамма борини бериб ўйнаши керак.
- Ўзбекистон миллий терма жамоаси "Нефтчи" ва "Сурхон"билан ўртоқлик учрашуви ўтказишни лозим топди. "Нефтчи" - Ўзбекистон чемпиони, лекин бежизга "Сурхон" ҳам танланмаган бўлса керак?
- Бунинг учун хурсандмиз. Лекин қиладиган ишимиз жуда кўп. Буни жуда яхши тушуниб тураман. Ўзим ҳам мураббий сифатида ўзгаришим ва кўп ишлашим керак. Албатта, мен хоҳлаган жамоани тузиш учун вақт керак бўлади ва ишонаманки, иккинчи даврада биз бошқа жамоага айланамиз. Ҳали жамоа ҳам, жамоага қўйиладиган талаблар ҳам ўзгаради.
- Маълумки, клуб белгиланган вазифани бажариши учун иқтисодий муаммоларга дуч келмаслиги талаб этилади. Бу мавсум "Сурхон"да ҳам муаммолар кўзга ташланди. Ҳозирги молиявий ҳолат қанақа?
- Раҳбариятга катта раҳмат, кўп нарсалар ижобий ҳал қилинди. Қарз бор, лекин озгина. Асосий тўловлар амалга оширилди. Бугунги мағлубиятга бунинг дахли йўқ. Менимча, йигитларда кўтаринки кайфият камроқ бўлди, балки мураббий сифатида мен етказиб бера олмагандирман. Ҳар бир проофессионал футболчи ўйинга алоҳида ўзи тайёрланиши шарт.
- Бугунги мағлубиятдан кейин жамоанинг гуруҳдан чиқиш имкониятларини қандай баҳолайсиз? Чунки Кубокда кейинги баҳс "Пахтакор" билан бўлади.
- Айтиб ўтганимдек, бу мағлубият мен учун ҳам дарс бўлди. Ротация яхши нарса, кам ўйин амалиётига эга футболчилар унумли фойдаланса, ўзига яхши бўлади, бундан ҳам жамоа ютади. Лекин ротация фойда бермаса, демак мураббий хато қилган бўлади. Келажакда бу каби хатоларни такрорламасликка ҳаракат қиламиз.
