Янги чемпионларингни қабул эт, Ўзбекистон!

Чемпионатни кўтаринки кайфиятда ўтказган қизларимиз мавсум тугашига тўрт тур қолганда муддатидан олдин Ўзбекистон чемпиони деган шарафли номга сазовор бўлишди.

Тошкентнинг “Бунёдкор-W” жамоасига қарши ўйин бекободлик қизлар учун принципиал характерга эга учрашув эди. Зеро мазкур учрашувда ғалаба бекободликларга биринчи марта Ўзбекистон чемпионлигини тақдим этиш баробарида тез орада ўтадиган Ўзбекистон кубоги финал ўйини олдидан ўз кучларига бўлган ишончни янада ошириб олиш имкониятини берарди. Зеро, мамлакат кубогининг бу йилги финал учрашувида “Бунёдкор” финал йўлланмасини қўлга киритиб улгурган, бекободликлар эса ярим финалнинг жавоб учрашувини ўтказишгач қалдирғочларнинг рақибига айланади. Бунинг учун эса бироз вақт керак бўлади.

17-тур доирасидан ўрин эгаллаган  учрашув муҳим аҳамият касб этиши боис “разведкасиз”, муросасиз курашлар остида бошланди. Тарихи давомида биринчи марта Ўзбекистон чемпионлигини муддатидан олдин қўлга киритиш арафасида турган бекободликларда иштиёқ баландлиги илк сонияларданоқ сезилди. Уларнинг катта куч билан олдинга ташланишлари, кетма кет хавфли вазиятларни юзага келтириши пойтахтликларни довдиратиб қўйди. Бу эса тезда ўз самарасини берди. Ўйиннинг 13-дақиқаси ўтиб бораётганда жарима майдони ичида Маҳлиё Сарикова – Дилдора Нозимова – Людмила Карачиклар комбинацияси “Металлург-вумен” тўпурарининг аниқ зарбаси билан интиҳо топди – 1:0.

Таваккал қилишни хохламаган бекободликлар ҳужумкор ўйинларини давом эттиришди ва 20-дақиқада Ольга Қаҳҳоровани иккинчи марта тўпни ўз дарвозаси тўридан олиб чиқишга мажбур этди. Бу сафар Людмила чап қанотдан тўпни айлантириб, дарвозанинг юқори бурчагига туширди – 2:0.

Тайм ўрталарига келганда “қалдирғочлар” бироз ўйинни тенглаштиришди. Уларнинг олисдан бераётган зарбалари Гуландом Бойматовани бироз хавотирга солди. Аммо ҳимоячиларнинг кўмаги “Металлург-вумен” посбонининг ўз “пости”ни ишончли қўриқлашини таъминлади.

Ўйиннинг иккинчи таймида ҳам сценарий ўзгармади. Ташаббус тўлиғинча майдон эгалари томонида бўлди. 52-дақиқа ўтиб бораётганда “Металлург-вумен”нинг иккинчи тўпурари Маҳлиё сарикова ўзини кўрсатди – 3:0. Ҳисобни йирик кўринишга олиб келиб қўйгач, мезбонлар бироз хотиржамликка берилишди. Тошкентликлар бир неча бор қулай вазиятлар яратишди, аммо улардан фойдалана олишмади. “Металлург-вумен” эса аксинча кучини тежаган ҳолда қарши ҳужум тактикасига ўтди. Натижада 72-дақиқада шундай ҳужумлардан бири гол киритилиши билан якунланди. Людмила Карачикнинг чап қанотдан ошириб берган тўпини Маҳлиё сарикова қийинчиликсиз дарвоза тўрига туширди – 4:0.

Бунёдкорчилар барибир жавоб голини киритишга муваффақ бўлишди. Бу ўйин тугашига саккиз дақиқа қолганда содир бўлди. Аввалги мавсумларда “Металлург-вумен” шарафини ҳимоя этган Наргиза Абдурасулова фарқнинг бироз қисқаришини таъминлади – 1:4.

Шундай қилиб, 2017 йил аёллар футболи бўйича Ўзбекистоннинг янги чемпионлари номини тақдим этди. Бу Бекободнинг “Металлург-вумен” жамоасидир. Барчангизни тарихий воқеилик билан табриклаймиз, азиз ҳамшаҳарлар! Янги чемпионларингни қабул эт, Ўзбекистон!

“Металлург-W” – “Бунёдкор-W” – 4:1 (2:0).  01.11.2017 йил. Бекобод. 300 томошабин.
Ҳакамлар: Эдита Миробидова, Қаҳрамон Собиров, Акбаржон Солиев, Александра Кончикова.
Назоратчи ҳакам: Константин Смирнов.
Голлар:1:0 – Людмила Карачик (13), 2:0 – Людмила Карачик (20), 3:0 – Маҳлиё Сарикова (52), 4:0 – Маҳлиё Сарикова (72), 4:1 – Наргиза Абдурасулова (82).
“Металлург”: 1. Гуландом Бойматова, 3. Зумраджон Назарова, 4. Насиба Ҳожиева (23. Диёра Ҳабибуллаева, 78), 6. Ирода Турдалиева (18. Юлдуз Набиева, 69), 7. Маҳфуза Туропова (8. Зиёда Ирисбоева, 83), 9. Маҳлиё Сарикова, 10. Феруза Турдибоева, 11. Дилдора Нозимова, 22. Мавлуда Мунавварова, 25. Людмила Карачик (99. Лутфинисо Ҳамидова, 76), 77. Нозима Камолтоева (21. Холида Дадабоева, 78).
Заҳира: 30. Дилафрўз Ҳожиева, 20. Диёра Эркинова.
“Бунёдкор”: 1. Ольга Қаҳҳорова, 3. Дарина Федосенко (5. Анзила Ермакова, 78), 10. Саида Галимова, 11. Екатерина Сальникова, 13. Лидия Цема, 15. Умида Зоирова, 18. Мадина Юсупова (9. Мария Моисеева, 34), 20. Дилноза Бектемирова, 21. Тожинисо Рашидова (8. Наргиза Абдурасулова, 61), 22. Солиҳа Ҳусниддинова, 77. Луиза Садирова.
Заҳира: 25. Диёра Ғуломова, 2. Муқаддас Абдуллаева, 7. Лиана Нарбекова, 17. Эъзоза Шарипова.
Огоҳлантиришлар: Ирода Турдалиева (37),
 Энг яхши ўйинчилар: Феруза Турдибоева – Саида Галимова.