Шомуродов "Фиорентина"га қарши, "Милан" - "Сампдория", Турин дербиси ва А Серия 29-турнинг бошқа ўйинлари превьюси

"Милан" - "Сампдория"

Пиолининг бахтига Доннарумманинг тести манфий жавобни берди, шунингдек, Анте Ребич ҳам соғайиб сафга қайтди. Шундай бўлсада, яна бир қатор футболчилар тикланиш жараёнида: Леао, Калабрия, Романьоли ва Манджукич бугун жамоага ёрдам бера олмасликлари аниқ, Браим Диас - эса сўроқ остида. "Сампдория" ҳам йўқотишларга учраган. Етакчилардан бири Экдалнинг ўйнамаслиги аниқ, шу билан бирга Берешиньский ва Янктонинг ҳам майдонга тушиши сўроқ остида. Ҳужумда катта эҳтимол Квальярелла - Габбьядини жуфтлигини кўрамиз, уларга орқароқдан Даамсгард ёрдам беради.

Биринчи давра учрашувида "Милан" Генуяда (2-1) ғалаба қозонган. Ҳақли равишда "россонери" бу ўйиндан олдин ҳам фаворит дея эътироф этилмоқда. Пиоли шогирдлари учун терма жамоалар ўйинлари сабаб юзага келган танаффус қўл келди, аммо генуэликлар ҳақида бундай деб бўлмайди. Тахминимизча Раньери шогирдлари иккинчи рақам бўлиб ҳаракат қилиб, Златан ва шерикларига имкон қолдирмай, қарши ҳужум учун қулай фурсатни кутиб ўйнашади.

"Аталанта" - "Удинезе" 

Бергамолилар учун асосий янгилик - Госенснинг сафга қайтиши, лекин Хатебур бу ўйинда жамоасига ёрдам беролмайди. Шунингдек, тест натижалари шубҳа уйғотган Пессина ва Толойнинг ҳам майдонга тушиши сўроқ остида. Ҳужумда Гасперини танлаш имконияти мавжуд ва у термадан ким қанчалик чарчоқ билан қайтганига эътибор қаратса ажаб эмас. Готти мамнун бўлиши мумкин, сабаби Пуссетодан бошқа барча ўйинга тайёр. "Удинезе" Гасперини жамоаси тактикасига кўзгу тутса керак, фақатгина шу йўл билан уларни муаммога дучор қилиш мумкин.

Биринчи даврадаги баҳсда "Удинезе" ва "Аталанта" муроса кўчасини танлашган (1-1). Бўлажак ўйиндан аввал "бергамоликлар" яққол фаворит. Терма жамоалар ўйинларидан кейин "Аталанта" кўпинча қийналади, аммо нима бўлса ҳам ўз уйида ҳаракат қилувчи Гасперини шогирдларидан ёрқин ўйин кутиш мумкин.

"Торино" - "Ювентус" 

"Буқалар" лагеридан яхши хабарлар келди, терма жамоалардан қайтган футболчилар тест топширган ва ҳеч кимда ҳеч қандай муаммо йўқ. Бу эса таркибда буткул йўқотиш йўқлигини англатади. Бош мураббий Николада танлаш учун вариантлар етарли ва у дербида қандай ҳаракат қилиши анчайин қизиқ. "Ювентус"да Буффон дисквалифиция қилинган, Бонуччи эса коронавирус бўлиб қолган. Шунингдек, бу учрашувда Демираль ва Алекс Сандро ҳам майдонга тушолмайди. Дибала, Артур ва Маккени эса дўстлар даврасида бўлиб ўтган шов-шувли байрам сабаб қайдномага киритилмади. Лекин Криштиану ажойиб спорт формасида ва чемпионат тўпурарлари пойгасида курашни давом эттириш учун шай.

Умуман олганда Турин дербиси доим диққатни торта олган. Аввалги учрашувда "Ювентус" 2-1 ҳисобида зафар қучган ва бўлажак ўйиндан аввал ҳам айнан у фаворит. Жамоа кўплаб очко йўқотди ва етакчиларни янада узоқлаштириб юборишга ҳаққи йўқ. Бироқ "буқалар" ҳам осонликча таслим бўлмасликлари турган гап. Уларнинг ҳам ўз муаммоси бор, "Торино" А Серияда жон сақлаш ҳақида бош қотирмоқда.

"Женоа"-  "Фиорентина"

Амалда бу яқин ўтмишда РПЛда тўп тепган икки ҳужумчи дуэли бўлиши мумкин эди. Бироқ Александр Кокорин бу ўйинда майдонга тушмаслиги аниқ бўлиб улгурди. Бошқа йўқотишлар йўқ ва Якини ўзининг янги-эски жамоасида барча футболчилар хизматидан фойдалана олади. Бироқ катта ўзгаришлар кутишга хожат йўқ. "Женоа" эса Лука Пеллегрини хизматларидан фойдалана олмайди, бошқа етакчилар сафда. Балардини бу сафар ҳужум чизиғида кимларни асосий таркибда майдонга тушириши қизиқ, ҳужумчилар ўртасида кураш чиндан муросасиз.

Охирги ўзаро учрашувда дуранг қайд этилган - 1-1. Бу сафарги ўйиндан аввал эса букмекерлар "грифонлар"га паст баҳо бермоқда. "Фиорентина" уларнинг фикрига кўра бўлажак баҳс фаворити экан. Ҳа, мураббий алмашиши футболчиларни "уйғотиши" мумкин, умуман олганда "фиалкаларнинг" таркиби ҳам анчайин қизиқарли, бироқ "Женоа" бу йил ўз майдонида ҳали ютқазмаганини унутмаслик лозим. Ваҳоланки ўтган даврда бу ерга "Милан" ҳам, "Наполи" ва "Лацио" ҳам меҳмонга ташриф буюрганди.

"Болонья" - "Интер"

Синиши Михайлович таркиб туфайли катта муаммоларга дуч келган. Скоропуски ковид бўлган, Паласио ва Сантандер ҳам ўйинни ўтказиб юбориши аниқ. Шунингдек яна Бэрроу ва Фарагонинг ҳам майдонга тушиши катта сўроқ остида. Кўп нарса Орсолинининг спорт формасига ҳам боғлиқ, унинг елкасига креатив қарорлар қабул қилиш муаммоси тушади. "Интер" учун асосий янгилик Ханданович ва  Де Врейнинг сафга қайтгани бўлмоқда. Ҳар икки футболчи ўйинни стартда бошлаши мумкин. Бошқа "сюрпризлар" бўлмаса керак. Конте охиргача Гальярдини ёки Эриксендан бирини танлаши зарур.

Сўнгги марта "Интер" ўз уйида ортиқча қийинчиликсиз "Болонья"ни таслим қилганди. Меҳмонда бўлсада, "нерадзурри" фаворит ҳисобланади, қўшимчасига "россоблу"нинг муаммоларини инобатга олсак. Албатта, Михайлович учун бу беллашув жуда муҳим, унинг жамоаси ҳам курашишни яхши кўради, лекин ҳозирги "Интер"ни тўхтатиши - ўта қийин вазифа.

Сергей Румянцев
Нозима Зарипова таржимаси