Про лига. Тимур Кападзе: "Илк турда "Нефтчи" билан ўйнашимизнинг ҳавотирли жойи йўқ"

Бевосита қуръа ташлаш маросимидан сўнг жамоа бош мураббийи Тимур Кападзе сайтимизга фикрларини билдириб ўтди.

"Қуръа ташлаш маросими яхши савияда ташкил этилди. Бу кунни ҳаяжон билан кутаётган эдик. Рақиблар, мусобақа формати, бошқа ўйлантираётган саволларга жавоб олдик. Биринчи турда енгилроқ рақиб тушсин, деган ният ҳам бор эди. Лекин мавсумни "Нефтчи"га қарши меҳмонда бошлайдиган бўлдик. Фикримча, ҳавотирга ўрин йўқ. Барибир кейинги турларда тўқнаш келардик. Ҳозирги таркибимиздаги футболчиларнинг аксарияти катта футболда энди дебют қилади. "Нефтчи" каби кучли рақиблар билан ўйинда руҳий тайёргарлик муҳим аҳамият касб этади. Яхши тайёргарлик кўрамиз ва керакли натижани қўлга киритамиз, деган умиддаман ",- дейди Тимур Кападзе.