Темур Мамасидиқов: "Танаффус вақтида Тимур Кападзе бизга жуда катта мотивация берди"

Тошкентда "Олимпик" жамоаси ўз уйида "Оқ-тепа" клубини қабул қилди ва 2:1 ҳисобида ғалаба қозонди. Учрашувнинг биринчи голи муаллифи ва ўйин давомида яхши ўйин кўрсатган Темур Мамасидиқов баҳсдан сўнг сайтимизга интервью берди.

— Темур ака, Про лигадаги илк ғалаба билан табриклаймиз. Дастлаб ўйин ҳақида фикрларингиз...
— Биз жуда ҳам кўп руҳий тайёргарлик кўрдик. Ўтган турдаги дурангдан кейин ғалаба қозониш бу яхши. Менимча, ўйинга руҳий жиҳатдан тайёрлигимиз эвазига ғалаба қозондик.

— 1-бўлимда жамоа кўп бора яхши ҳужумлар қилди, лекин улардан фойдалана олмади. 2-бўлимда эса вазиятлардан яхши фойдаланилди. Танаффус вақтида бош мураббий қандай кўрсатмалар берди?
— Танаффус вақтида мураббий бизга жуда катта мотивация берди. "Бу бизнинг ўйин, ютиш керак", деди. Вазиятлардан фойдалансак, ўйинимиз очилиб кетишини айтиб ўтди. Ва биз вазиятлардан унумли фойдаландик.

— Жамоада ҳамма футболчи ёш, шунингдек, турли хил жамоалардан келган. Жамоада ички ҳолат қандай?
— Ички ҳолат жуда ҳам ажойиб. Шароит ҳам зўр. Бизни ҳозирдан Олимпиадага тайёрлашмоқда. Клуб ҳам шунинг учун очилди.

Оғабек Самисов ёзиб олди