Самвел Бабаян: "Ўйин охирида мезбонлар очко олиш учун вақт чўзишди. Биз эса охиригача ғалаба учун ҳаракат қилдик"

- Ўйин ҳақидаги фикрингиз қандай?

- Водий дербиси доим ҳаммада қизиқиш уйғотади. Икки жамоа қандай ўринда бўлмасин, бу учрашув доим қизиқ бўлиб келган. Бугун ҳақиқий футбол кўрдик. Курашларга бой ўйин бўлди. Бизда тайёргарликда бироз муаммолар бўлди чоғи, вазиятларни якунлашда муаммо юзага келди. Бу ерга ғалаба учун келгандик. Охирги сонияларгача ҳужум қилишга ҳаракат қилдик. Рақибнинг яхши ҳимоясини ҳам таъкидлаб ўтиш керак. "Нефтчи" ушбу мавсум иккинчи рақамда ўйнаб, қарши ҳужумда ҳаракат қилмоқда. Биз бунга тайёр эдик, аммо бир неча вазиятларда уларга имконият бердик. Ўйин охирида мезбонлар очко олиш учун вақт чўзишди. Биз эса охиригача ғалаба учун ҳаракат қилдик. Нима бўлишидан қатъий назар, йигитлар ҳаракат қилишди. Бу ўйин бизга дарс бўлди.  Ҳаммаси жойида. Кейинги ўйинларга сифатли тайёргарлик кўрамиз. 

- Остон Ўрунов бугун терма жамоадаги ўйинларидан кейин бироз толиққандек туюлди. Шу ҳолатга фикрингиз қандай?

- Остонга нисбатан рақиблар бошқача тайёргарлик кўришни бошлашди. Бугун ҳам ҳар бир вазиятда унинг олдида "Нефтчи" ўйинчилари пайдо бўлди. Иккинчидан, Остон бугун ўйинга кичик жароҳат билан чиққанди. Бунинг учун унга қойил қолишимиз керак.

- ФИФА кунлари доирасида "Навбаҳор"дан 6 та футболчи терма жамоаларга чақирилди. Ушбу ўйничиларнинг учрашувга тайёргарлик жараёнида иштирок этмагани жамоа ўйинига таъсир қилдими?

- Ўйинчиларимизнинг термага чақирилиши бу катта шараф. Бу улар учун тажриба. Бироқ, бугунги ўйинга футболчилар турли хил спорт формасида келишди. Очиқчасига айтаман, биз билан ўйинга тайёрланган футболчилар бугун яхши ҳаракат қилишди. Улар жароҳатланганларни ҳам ўрнини билдиришмади. Яна қайтараман, терма жамоага чақирилган футболчилар жамоамизда бўлиши бу шараф. Уларнинг сони кейинги йиғинларда кўпроқ бўлишига ишонаман. Черногория термасига чақирилган футболчимиз эса у ерда 45 дақиқа ўйнаб, овқатдан захарланиш билан ортга қайтди. Шу сабаб ҳам у бугун ўйинда ўзини кўрсата олмади. Умуман олганда бу нарса бизга тажриба бўлди.  

- Жамоанинг ёзги трансферлар ойнасидаги режалари ҳақида гапира оласизми?

- "Навбаҳор" ҳар куни жамоани қандай кучайтириш ҳақида ўйлайди. Бироқ, бизда ҳам маълум имкониятлар бор ва биз бу чегарадан четга чиқа олмайман. Нимели борасидаги хабарлар эса ҳақиқатга тўғри келмайди. Бошқа ўйинчилар, кучайтиришларни эса шовқин кўтармасдан бажариш керак.

- Биринчи давра якунланишига бир тур қолди. Фикрингизча, "Навбаҳор"га чемпионлик йўлида ким рақобат қилиши мумкин?

- Ҳозир вазият қизиқарли тус олган. Ўтган йилги каби рақобат бўлиб, охирги турга қадар босим остида бўлишимизни истаб қолардим. Турнир жадвалидаги олти жамоа чемпионлик учун курашда деб ҳисоблайман.