Салиба ва Габриэль қуруқ ўйинлар бўйича АПЛ тарихида иккинчи ўринга чиқиб қолди. Олдинда Фердинанд - Видич жуфтлиги бор

Лондоннинг "Арсенал" жамоаси марказий ҳимоячилари Вильям Салиба ва Габриэль Англия Премьер-лигасидаги "қуруқ" ўйинлар сони бўйича иккинчи ўринга чиқди. АПЛнинг 22-тури доирасида "Ноттингем Форест" билан ўтказилган учрашувда (0:0) ҳимоячилар жуфтлиги дарвозасини дахлсиз сақлаган 47-ўйинини қайд этди.

Шу тариқа, Салиба ва Габриэль бу кўрсаткич бўйича "Челси"нинг собиқ ҳимоячилари Жон Терри ва Рикардо Карвалью жуфтлигини (46 та) ортда қолдирди. Биринчи ўринда ҳамон "Манчестер Юнайтед"нинг собиқ ҳимоячилари Рио Фердинанд ва Неманья Видич жуфтлиги турибди, улар биргаликда 70 та ўйинда дарвозаларини дахлсиз сақлаган.

Энди Салиба ва Габриэль "қизил иблислар"нинг собиқ ҳимоячилари эришган натижани такрорлаш учун биргаликда яна 23 та "қуруқ" ўйин ўтказишлари лозим.