Рўзиқул Бердиев: "Афсуски, мавсум биз учун бир текис ўтмади"

- Ўйин ҳақида фикрингиз?

- Аввало клубимиз раҳбарияти ҳамда вилоятимиз раҳбарларига ушбу мавсум учун миннатдорчилик билдираман. Бизни йил бўйи қўллаб турган мухлисларга ҳам катта раҳмат. Афсуски, мавсум биз учун бир текис ўтмади. Шунга қарамай, эсда қоларли ўйинлар кўп бўлди дея оламан. "Динамо" ҳам бизга ўхшаб ҳужумни ёқтирадиган жамоа, бугун дарвозаларга тўп киритилмаган бўлса ҳам, ўйин шиддатли ўтди. Кўплаб вазиятлар яратилди. Менимча, дуранг адолатли бўлди. Ғалабага бўлган иштиёқ ва хоҳиш юқори эди. Яна бир ҳаммага раҳмат айтиб қоламан.

- "Насаф" етакчиларига таклифлар бўлаётганини эшитдик.

- Биласиз, декабрда ҳам ўйинимиз бор. Ҳозир футболчиларга дам бериб, 23 декабрь кунги Элит ОЧЛ баҳсига ўн кун қолганида машғулотларни бошлаймиз. Футболда миш-мишлар сира тинмайди. Клубда ишлаб баъзан ўзимиз ҳам жамоага ким келаётгани ёки ким кетаётганини матбуотда ўқиб ҳайрон қоламиз. Лекин ҳар бир трансфер расман амалга ошмагунча шунчаки гап-сўз бўлиб қолаверади. Жамоамиз етакчиларидан ҳали ҳеч ким олдимизга келиб кетмоқчи эканини айтгани йўқ. Агар таклифлар бўлса ўйлаб кўрамиз.

- Бу йил "Насаф" легионерлардан фойда кўрмагани ҳамда умуман қониқмагани кўринди. Шундан келиб чиқиб легионерлар жамоани тарк этадими?

- Баъзи бирларидан нафақат мен, балки клубимиз ҳам қониқмади. Бу ҳақда олдин ҳам гаплашгандик. Шартномани сал аввалроқ бекор қилишимиз мумкин эди, бироқ мавсум тугашига оз қолгани учун индамай турдик. Тўғриси, легионерларнинг бизга фойдаси тегмаяпти ва улар билан шартнома бекор қилинади.

- "Насаф" "Динамо"нинг бир нечта футболчисига қизиқиш билдиряпти деб эшитдик.

- Боя айтганимдек, трансфер амалга ошмагунча гап-сўз бўлиб қолаверади. Футболда қайсидир жамоанинг қайсидир футболчига қизиқаётгани ҳақида гап чиқиши табиий ҳол. Шуни айтишим мумкин, "Динамо"нинг ўйин услуби бизнинг жамоа ўйинига жуда яқин. Футболчилар ҳам тез мослашиб кета олади деб ўйлайман. Лекин барибир ҳаммаси ҳозирча гап-сўз.

- Чолович бугун майдонга тушмади.

- Жароҳати сабаб қайдномага киритмадик. Ойбек Бозоров ҳам бугун ёрдам бера олмади.

- Мавсум давомида "Насаф"нинг кашфиёт футболчиси ким? Ва ишончингизни умуман оқламаган ўйинчи?

- Кашфиёт демаган бўлардим-у, лекин Сардор Баҳромов мавсумни жуда яхши ўтказди. У олимпия терма жамоасига, сўнгра миллий терма жамоага ҳам чақирилди. Ишончни оқламаган футболчилар деб баъзи легионерларни кўрсата оламан.

- Янги мавсумда легионерларни клубга жалб этиш қандай бўлади?

- Раҳбарият билан учрашувдан сўнг бу мавзу ҳақида гаплашсак бўлади деб ўйлайман. 

- Бугун Марко Станоевичга тўн кийдириш маросими ўтказилди.

- Марко "Насаф" учун катта иш қилган. Ўтган йил у билан шунчаки хайрлашиб қўйгандик. Бу йил эса тўн кийдириш маросими ўтказилди. Бу ҳам яхши бўлди, чунки бошқа футболчиларга мотивация бўлади, қолаверса Марко учун ҳам унутилмас воқеа бўлди.

- Ўтган йилги чемпион мавсумни 3-ўринда тугатди. Бу борада қандай хулоса бера оласиз?

- Тўғрисини айтишимиз керак, миллий чемпионат даражаси ва футболчилар савияси ўсиб бормоқда. Терма жамоа иштирокидаги ўйинлар ҳам гапимга исбот бўла олади. Юртимизда футбол ривожи учун барча шароитлар амалга ошяпти. Насиб қилса, ўзбек футболи янада ривожланади.