Равшан Эрматов билан дуч келган мундиалда майдонга тушиш учун пул тўлаган, "Атлетико Мадрид" либосини кийган ҳамда Арманистонда рекордлар қайд этган "Насаф"нинг янги легионери билан яқиндан танишамиз

Юсуф Отубанжо 1992 йилнинг 12 сентябрида Нигерияда таваллуд топган. У дастлабки қадамларини Эммануэл Амунике футбол академиясида ташлаган. Отубанжонинг севимли жамоаси "Манчестер Юнайтед" ҳисобланади. У Руд ван Нистелройни ўзининг кумири бири деб билган. Отубанжо болалигида, Лагосдан 100 километр шимоли-шарқда жойлашган Ижебу-Оде шаҳрида футбол ўйнаётган кезларида "Манчестер Юнайтед" таркибида 95 та гол урган нидерландиялик футбол афсонасининг либосини кийиб юрган. У еттита ака-ука ва битта опа-сингилнинг энг кичиги бўлиб ўсган. Отаси тўрт ёшида вафот этган.

Мен отамни билмай ўсганман, лекин онам доимо ёнимда бўлган. Кўплаб одамлар онамга келиб, менга футбол ўйнашга рухсат беришини сўрашарди. У менга Ижебу Оде грамматика мактабига боришга ҳам рухсат берди. У ерда мен мактаб жамоасида, шунингдек, клуб жамоасида ўйнардим.

Ўрта мактабни тугатганимдан сўнг дарҳол "Юлиус Бергер"да синов ўйинларида қатнашдим. У пайтда жамоа биринчи дивизионда иштирок этарди. Жамоанинг машғулот маркази Абеокутада, уй майдонимиз эса Апапа портида жойлашганди. Ҳар куни машғулот учун Лагосдан Абеокутага бориб келишни тасаввур қилаверинг. Бу жуда фойдали тажриба бўлди ва буларнинг барчаси мени келажак сафарларга тайёрлади. U-17 саралаш мусобақаларига боришдан олдин у ерда бир муддат ўйнадим. Кейинчалик "Гейтвэй" жамоасига қўшилдим, сўнгра "Краун"га ўтдим.

Отубанжо 2009 йил Нигерияда ўтказилган U-17 Жаҳон чемпионати кумуш медали соҳибига айланган "Олтин бургутлар" таркибида бўлган. У нимчорак финалда Янги Зеландия ва финалда Швейцарияга қарши ўйинларда захирадан майдонга тушган. Ўша мундиал давомида Нигерия иштирокидаги икки ўйинни ўзбекистонлик собиқ ҳакам, ҳозирда Ўзбекистон футбол ассоциацияси вице-президенти лавозимида фаолият олиб бораётган Равшан Эрматов бошқариб борган.

2009 йилда U-17 терма жамоаси қабул синовларига икки марта қатнашдим, охиргиси муваффақиятли бўлди. Ўша пайтдаги мураббийни эслай олмайман, лекин у ерга борганимда, мени бошқа ўйинчилар орасидан танлаб олишди ва бизга "Сизлар энг зўрсизлар, аммо бизда бошқа жамоа бор, керак бўлганингизда сизга хабар берамиз" дейишди. Шундан сўнг мен Лагосга қайтдим. Июль ойи атрофида, бизни жаҳон чемпионатига олиб борган Жон Обу навбатига келгунга қадар уч марта мураббий алмашгани боис, бошқа бир мураббий чақируви остида яна лагерга бордим. Иккинчи сафар исм-шарифимиз ва рақамларимизни энг яхши 20 талик рўйхатига киритишди. Жон Обу бошқарувни қўлга олмагунча бу иш амалга ошмади. Мени қўллаб-қувватлаган Жеймс Питер исмли одам ҳам бор эди. Абужага саралаш учун борганимизда, асосий жамоа Гамбияда баъзи ўйинлар ўтказаётган эди. Аммо Жеймс бизни лагерда ушлаб турди ва мураббийга қўнғироқ қилиб, унда яхши ўйинчилар борлигини ва асосий жамоани енгишимизга ишончини билдирди. Бир неча ҳафтадан сўнг, улар қайтиб келишди ва биз уларга қарши ўйнадик. Мен гол урганим туфайли асосий жамоага қўшилиш учун танландим. Биз лагерга қайтдик ва улар 30 кишилик рўйхат тузишди. Эълон пайтида 29 та исм айтилди, лекин мен ўз исмимни эшитмадим. Мен 30-ўйинчи эдим. Бу ажойиб воқеа эди ва айтишим мумкинки, Нигерия терма жамоасида ўйнаш фақат истеъдод билан боғлиқ эмас. Истеъдоддан ташқари, ҳомийлар, маблағ ва алоқалар ҳам муҳим роль ўйнайди.

Мен лагерга кеч қўшилганим сабабли шундай дейишим мумкин, аммо мураббийга турнирда менга бироз ўйин вақти бериши учун исталган миқдорни тўлашга тайёр одамлар бор эди. Йиғинда ўйинчиларимиз бор эди ва биз орқамизда ким турганини ёки баъзиларимизга ҳомийлик қилаётганини билардик. Мен-чи? Ижебу Одедан. Ким мени танирди? Ҳатто Жулиус Бергердаги бошлиғим ҳам у ерга боришимни қўллаб-қувватламади. Бу жуда қийин вазифа эди, лекин менга ёрдам бера оладиган бир нечта одамлар бор эди. Менимча, Жаҳон чемпионатининг нимчорак финалида Янги Зеландияга қарши ўйинда биз уларни 4:0 ёки 5:0 ҳисобида ютаётган эдик, кейин мен тахминан 15 дақиқа ҳужумчи эмас, ярим ҳимоячи сифатида ўйнадим. Ўша 15 дақиқадаги энг кулгили нарса шундаки, мен ўйнашим учун одамим 150 000 наира тўлаганини билиб қолдим. Мен шунчалик ғазабландимки, нега у менга шунчаки пулни бермай, 15 дақиқа ўйнашим учун шунча пул тўлади, деб сўрадим. Охир-оқибат, бу голлар жуда фойдали тажриба бўлди, ҳатто 21 кишилик рўйхатга киришдан олдин синовларга келган футболчилар сонини ҳам ҳисоблай олмадим.

Улар ваъдаларида туришганида жуда яхши бўларди. U-17дан сўнг биз тўғридан-тўғри U-20 жамоасига ўтдик, лекин бунинг шарти бор эди. Улар бизга яхши жамоада ва нуфузли лигада ўйнашимиз кераклигини айтишди. U-17даги фаолиятни тугатгач, карьерангизни давом эттириш ва кейинги терма жамоага қайтиб келиш учун яхшироқ имкониятларни излай бошлайсиз. Аслида, улар U-20 пайтида менга чалғитувчи маълумот беришди. Худога шукр, 2011 йилда "Атлетико Мадрид"га қўшилдим ва март ойида U-20 йиғини бошланди. Нигерияга ўз ҳисобимдан учиб бордим, аммо у ерга етиб боргач, мураббий мени чақирганига қарамай, режасига киритмаганини билдим. Улар келишимни кутишмаган экан. Парвозимга пул тўлашмади, шунинг учун уларни кутмай ортга қайтишга мажбур бўлдим. Бу ҳали асосий мусобақа эмас, балки дастлабки босқич эди ва йиғиндаги ўйинчилар катта жамоаларда ўйнашмасди. Мен улар билан бемалол рақобатлаша олардим, аммо таркибга ҳам кира олмадим.

Шунга қарамай, таслим бўлмадим. Ёш футболчи сифатида, ватанга бўлган муҳаббатим ва U-17даги тажрибам туфайли, мамлакат учун яна кўпроқ нарса қилишни истардим. Нигерия терма жамоасида ўйнаш имкониятига эга бўлмаганим жуда ачинарли. Бироқ, U-23 терма жамоасида мураббийлар Остин Игуавоэн ва Даниэл Амокачи қўл остида имконият топилди. Бу мен учун энг яхши тажриба бўлди. Миллий жамоада ўйнашнинг ҳақиқий моҳиятини ҳис қилган ягона пайт шу эди. Ўшанда 20 ёшдаги ўйинчи бўлсам-да, катта ёшли футболчилар билан бирга ўйнадим ва ўз услубимни топдим.

Клублар миқёсида профессионал фаолиятимни "Атлетико Мадрид"нинг учинчи жамоасида бошладим. Иккинчи жамоа билан шартномам бор эди, лекин виза ва шунга ўхшаш масалалар туфайли бир ярим йил давомида учинчи лигада ўйнашга тўғри келди. Испанияда агентим йўқлиги туфайли муаммоларга дуч келдим. Ўша пайтда уйдаги агентим чет элдаги бирор жамоа сафига ёзилмаслигимни, акс ҳолда нонкўрлик қилган бўлишимни айтди. Шу сабабли Испанияни тарк этишимга тўғри келди, аммо Ла Лигада ўйнашни жуда хоҳлардим, чунки уларнинг ўйин услуби қизиқарлироқ эди. Ҳаётда кейинги қадамлар қаерга олиб боришини олдиндан айтиб бўлмайди.

Отубанжонинг кейинги жамоаси ҳам ўз ўрнига эга эди – "Зальцбург".

Агентим менга: "Юсуф, сен Австрияга кетяпсан", деди. Бир зумда ўзимни "Зальцбург" либосида кўрдим. 

У "Буллс" жамоаси сафида лиганинг атиги битта ўйинида майдонга тушди, сўнг тез орада ўзини икки лига пастроқ бўлган "Юниорс" жамоасига ижарага берилди. 2015 йил "Блау-Вайсс" сафига қўшилган ҳужумчи 39 ўйинда 34 та гол уришга муваффақ бўлди ва жамоанинг иккинчи лигага кўтарилишида улкан ишни амалга оширди. Сўнгра Словакиянинг "Жилина" клубига қўшилган Отабанжо 2016/17 йилги мавсум мамлакат чемпионига айланди. У ўша мавсум лигади 18 ўйинда 8 та тўп киритиб, титулга муносиб ҳисса қўшди.

Кейинчалик Австриянинг яна икки клуби шарафаини ҳимоя қилган Отубанжо 2020 йил 23 январда Арманистоннинг "Арарат" клуби билан шартнома имзолади. Аввалги мавсумда лигада кам имкониятга эга бўлдим ва янги имкониятларни кутаётган эдим. Шунда "Арарат" пайдо бўлди ва ушбу жамоага қўшилишга қарор қилдим, чунки улар Арманистондаги энг кучли жамоалардан бири ҳисобланади. Ҳеч бўлмаганда ўйин амалиётига эга бўламан, янги жамоам билан ўйинимни қайта шакллантираман ва ундан кейин юқорига кўтарилишимиз мумкин.

"Арарат" жамоасида ўйнаган даврида у 77 та ўйинда 28 та гол уриб, ўзининг гол уриш қобилиятини намоён этди, бу эса "Пюник" жамоасининг эътиборини тортди. "Арарат" 2019/20 йилги мавсум Арманистон чемпионига айланди.

2022 йил 11 июнда Отубанжо Арманистон Премьер-лигасининг бошқа бир жамоаси "Пюник" билан шартнома имзолади. Кейинчалик битим муддатини икки йилга узайтирди. Юсуф "Пюник" билан бир мартадан мамлакат чемпионлиги ва кумуш медалини қўлга киритди.

Отубанжо Европа Конференциялар лигасида турнинг ва гуруҳ босқичининг энг чиройли голи мукофотини қўлга киритган дастлабки нигериялик бўлиб тарихга кирди. У "Слован Братислава"га қарши ўтказилган ўйинда жамоасининг 2:0 ҳисобидаги ғалабасига ажойиб гол билан ҳисса қўшди. Юсуф Отубанжо 2023 йилги Арманистон Премьер-лигасининг энг яхши футболчиси деб топилди. 

Орзулар ушалди. Бутун мавсум давомида мени қўллаб-қувватлаган жамоадошларимга, мураббийларимга ва мухлисларимга миннатдорчилик билдирмоқчиман. Бу мукофот фақат меники эмас; у менга ишонган ва ҳар куни янада яхшироқ бўлишимга туртки берган барча инсонларга тегишли.

Шунингдек, Юсуф Отубанжо Арманистоннинг энг сермаҳсул хорижлик тўпурари сифатида тарихга кирди. Отубанжо "Арарат" ва "Пюник" жамоалари сафида жами 87 та гол урди ва Маркос Пиззелининг рекордини янгилади. Бундан ташқари, Арманистон чемпионатида икки мавсум тўпурарлик мақомига сазовор бўлди.

Футбол статистикага асосланади ва мен жамоамга ҳисса қўша олаётганимдан мамнунман. Арманистон футбол ўйнаш учун қулай жой, чунки кўп футболчилар бу лигага эътибор қаратмайди, лекин қаерда бўлманг, футбол мавжуд. Муҳими, ўзингизни қанчалик такомиллаштираётганингиздир, мен айнан шу ишни қилмоқдаман. Агар сиз ўйин вақти ва чемпионлик завқини ҳис қилиш имкониятини излаётган бўлсангиз, Арманистон ажойиб жой. Биз Европада ҳам ўйнаймиз ва лигада ғалаба қозониш сизни Европа Лигасига олиб чиқади, бу эса мен учун афзаллик яратади. Мамлакатда шунчалик узоқ қолдимки, бундай ҳолат биринчи бор содир бўлмоқда. Одатда, бошқа мамлакатларда икки-уч йилдан ортиқ қолмаганман. Мен Арманистонни ўзингизга босим ўтказмасдан ва нима қилаётганингизни билган ҳолда, хотиржам ўйнашингиз мумкин бўлган жой деб биламан.

2025 йил 29 июлда Ўзбекистоннинг "Насаф" клуби Юсуф Отубанжо билан шартнома имзолаганини эълон қилди.

Салом, "Насаф" мухлислари! Мен ажойиб жамоа аъзосига айланганимдан хурсандман. Биз тез кунда кўришамиз ва биргаликда совринларни қўлга киритамиз. Жамоанинг ажойиб мухлислари билан учрашишни интиқлик билан кутяпман. Кўришгунча!

Илк ўйинида уйига йиғлаб кетган, 15 ёшида терма жамоада дебют қилган ҳамда самолётда шуғулланган "Нефтчи" ҳужумчиси Сильванус Нимели билан яқиндан танишамиз

Ғиштдан дарвоза қуриб ўйнаган, "Атлетико" майдонида энг яхши футболчи деб топилган ҳамда Роналдудан жарима зарбаси тепишни ўрганган "Пахтакор"нинг янги легионери билан яқиндан танишамиз

Оқил Абдубарноев тайёрлади.