Отабек Шукуров: “Жарима тўпига яқинлашаётганимда айрим жамоадошларим масофа узоқ дея ишонмаганди”

Аммо иқтидорли футболчи жамоада юзага келган рақобатда ютиб чиқа олмади. Натижада Шукуров кўп вақтини захирада ўтказди. Давралар оралиғида эса Отабек жамоасини ўзгартиришга қарор қилиб, “Бухоро”га кўчиб ўтди. Айтиш керакки, янги жамоасида 20 ёшли футболчи етакчилардан бири бўлди. Бухороликларнинг сўнгги турда “Сўғдиёна” устидан қозонган ғалабасида Шукуров муносиб ҳисса қўшди. Айниқса унинг жаримадан урган голи жуда чиройли кўриниш олди. Отабек билан суҳбат чоғида бу ҳақда тўхталиб ўтдик.

- Отабек, аввало жамоангизнинг олий лигада жон сақлаб қолгани билан табриклаймиз. Айтингчи ёзда “Бухоро” сафига келаётганингизда элитада олиб қолишга қанчалик ишонгандингиз?  
- Фикрингиз тушундим. Биласизми давралар оралиғида бухороликлар лагерига келиб қўшилишдан олдин шахсан мен жамоани олий лигада қолишига ич-ичимдан ишонгандим. Чунки бунга имкониятларимиз етарлича эди. Қолаверса олий лигада истаган рақиб билан бемалол ўйнаб, ютишингиз ҳам мумкин деб ўйлайман. Чемпионликни қўлга киритган “Пахтакор”га қарши ҳам астойдил ўйнаса ютиш мумкин. “Бунёдкор”ни ҳам мағлуб этса бўлади. Футболда ютқазмайдиган жамоанинг ўзи йўқ. 

- Жуда қийин бўлган вазифани бажардинглар. Жамоа бунга қандай эришди?
- Жамоада ички муҳит аъло даражада эди. Мураббийлар штабида малакали мутахассислар фаолият олиб бораётгани сир эмас. Қолаверса таркибда ҳам юқори савиядаги футболчилар жамланган. Элитада қолиш осонликча бўлмади. Бунинг учун ҳамма бир ёқадан бош чиқарди. Иккинчи давра ўрталарига келиб, “Навбаҳор” ва “Шўртан”га имкониятни бой берганимиздан кейин руҳий холат кўнгилдагидек эмасди. Аммо кейинчалик “Металлург” ва “Нефтчи”ни мағлуб этганимиздан сўнг ўзимизга бўлган ишонч ортди. Чемпионатнинг охирги учта турида бизни фақат ғалаба қониқтирарди. Биргина дуранг ҳам вазиятни салбий томонга оғдириб юборишини яхши тушуниб тургандик.

- Чемпионатнинг сўнгги тури “Бухоро” учун гўёки финалдек ўтди. Фикримизга қўшиласизми?
- Ҳа. Кучлилар сафида қолиш учун кураш олиб бораётган икки жамоа ўртасидаги баҳс эди. Майдонга фақат ва фақат ғалаба қозониш илинжида тушгандик. Шу боис дастлабки дақиқалардан бошлаб, асосий эътиборни ҳужум қилишга қаратдик.

- Аҳамиятлиси мазкур учрашувнинг дебочасида масофа узоқ бўлишига қарамай жаримадан гол урдингиз. Фақат очиғини айтинг, тўпга яқинлашаётган пайтингизда гол уришингизга қанчалик ишонгандингиз?
- Бу биринчи маротаба жарима зарбасидан гол уришим эмасди. Бундан олдин “Нефтчи”га қарши учрашувда ҳам жаримадан тўп киритгандим. Шундан кейин қўрқмасдан жарима зарбаларини тепишга харакат қиляпман. Жиззахдаги ўйинда ҳам масофа узоқ бўлсада омадимни синаб кўрмоқчи эканлигимни айтдим. Аммо шу пайтда айрим жамоадошларим менга ишонмагандек бўлиб, узоқ эканлигини айтди. Шунга қарамай барибир аҳдимдан қайтмадим ва тўғри дарвоза томон зарба беришга қарор қилдим. Юз фоиз гол уришимга ишонгандим дея олмайман-ку лекин шунга харакат қилганим аниқ. ВИДЕО

- Давралар оралиғида “Бухоро”га кўчиб ўтишингиз бу – бизнингча “Бунёдкор”да асосан захирада ўтириб қолганингиз билан боғлиқ бўлса керак. Шундайми?
- Ҳа. Менга кўпроқ ўйин амалиёти зарурлиги боис ҳам иккинчи давра арафасида жамоамни ўзгартиришга қарор қилдим. “Бухоро”га мени Жамшид Саидов билан Тачмурод Агамуродов таклиф этганида уларга розилик бердим. 

- Эндиги режаларингиз қандай?
- “Қалдирғочлар” билан амалда шартномам бор. Шу боис энди яна Тошкент клубига қайтсам керак. Насиб қилса қишки йиғинлар чоғида ўзимни кўрсатиб, “Бунёдкор”да ҳам асосий таркибда ўйнай олишимни исботлайман.  

- Сўнгги савол. Яқинда Осиёнинг “Энг яхши ёш футболчиси” бўлишга яқин турган номзодлар эълон қилинди. Сиз билан ёшлар терма жамоасида бирга ўйнаган дўстларингиздан қайси бирини бу борадаги имкониятини юқори баҳолайсиз?
- Бу хабарни эшитганимдан жуда хурсанд бўлдим. Уларнинг ҳаммаси билан яқин дўстмиз. (Кулиб) Менга қолса совринни уччаласига ҳам берган бўлардим. Назаримда Достон билан Элдорнинг имконияти бироз юқорироқ.  

Исломбек Рустамбеков суҳбатлашди.