“Олтин тўп”нинг “бўлажак” эгалари кечикмоқда

Неймар
Рўйхатимизни Неймардан бошладик. Чунки, бугунги ўйинчилар ичида ушбу совринга энг кўп ҳақлиси ҳам айнан у. Кўпчилик Месси ва Роналдудан кейин “Неймарнинг даври” келади деган гапларни айтади. Бироқ, у юқоридаги афсонавий футболчилар каби узоқ вақтгача мавқеини сақлаб қола олармикан?  

ПСЖ ҳужумчиси ҳозир 26, Роналду 33, Месси эса 31 ёшда. Криштиану кетганидан сўнг, Лео жаҳон футболини ўз назоратига олади. Аммо, бунга бир ўзининг кучи етармикан?! Агар бунинг уддасидан чиқолмаса, у ҳолда Неймар “Олтин тўп”га асосий давогар бўлолади. Аммо ўша кунлар келгунча, у 28-29 ёш бўлса керак.

Неймар мукофотни қўлга киритишга бироз кеч қоляпти. Буни тан олиш керак! Ҳозир унинг имкониятлари анча юқори, лекин бразилиялик бундан тўғри фойдалана олмаяпти. “Олтин тўп-2018” соврини унга насиб қилиши қийин масала. Чунки у Франция Чемпионатида ҳам, Чемпионлар Лигасида ҳам мағлубиятга учради. Неймар ҳали Месси, Роналду, ван Бастендек ўйинчи бўлишига анча вақт керак. Бундан ташқари, у ўз устида тинимсиз ишлаши, имкониятларидан тўғри фойдаланишни ўрганиши зарур.

Гарет Бэйл
Бэйл 100 миллион евро эвазига “Тоттенхэм” клубидан “Реал”га ўтганида, жуда катта шов-шув бўлганди. Ўша пайтларда кўпчилик жамоанинг янги етакчиси Бэйл бўлишига ва ҳаттоки, Роналдунинг ўрнини боса олишига ишонган эди. Аммо, кўриб турганингиздек ундай бўлмади.  

Аввалига, Бэйл ҳақиқатдан ҳам кутилган натижага эриша олди. Бироқ, озгина вақтдан сўнг, у португалияликка енгилди. Тўғри, Гарет жуда иқтидорли ўйинчи эди. Шунчаки, у ортда қолиб кетишига кўп жароҳат олгани сабаб бўлди ва айнан шу ҳолатллар у Мадрид клубида ўзини тўлиқ очиб бериши, яхши ҳаракатланишига тўсқинлик қилди. Ҳа, тўрт мавсум давомида Бэйл “Реал” билан бир нечта совринларни қўлга киритди. У 1 мартта Испания Чемпионати ва 3 бора Чемпионлар Лигасида ғалаба қозонган бўлсада, “Олтин тўп” барибир Роналдуга насиб этганди.    

Гарет ҳозир 28 ёш ва Неймарга қараганда унинг имконияти анча камроқ. Келгусида “Олтин тўп”га эриша олармикан? Бир нарса дейиш қийин.

Эден Азар
Азар — ажойиб техника эга, тўпни яхши бошқариб, чиройли ва аниқ зарба бера оладиган футболчи. “Челси” мухлисларининг асосий қувончи бўлмиш 27 ёшли Эден Азар ҳам рўйхатимизга қўшилди. Кўпчилик уни “Олтин тўп”га лойиқ деб билса ҳам, тан олиш керак, белгиялик Неймарга қараганда кучсизроқ футболчи ҳисобланади. Агар Эден “Барселона” ёки “Реал” клубида фаолият юритганида, у ҳозир сайёрамизнинг энг кучли учинчи ўйинчиси бўлармиди?!

Лука Модрич
Лука аслида ажойиб ўйинчи. Агар ёш ва рақиблар ҳалал бермаганида, у аллақачон бу совринни қўлга киритган бўларди. 31 ёшли Модрич сайёрамизнинг энг яхши ўйинчиларидан бири деб топилган. Акс ҳолда, у ҳозир “Реал” таркибида фаолият юритмасди. Роналду бешинчи “Олтин тўп”ни ютганида, Лука 5-ўринни эгаллаганди. Лео ва Криштиану даври тугаганида, Модрич 33-34 ёшни қаршилаган бўлади ва ўша пайт мукофотни ютишига ҳеч қандай умид қилмаслиги ҳам мумкин.

Лука марказ ва ҳужум орлиғида ўйнайди. У ажойиб ярим ҳимоячи бўлишига қарамай, ҳали совринни қўлга киритишга муваффақ бўлгани йўқ. Хави ва Иньеста ҳам бунинг уддасидан чиқолмаган. Кўрамиз, хорватиялик буни эплай олармикан?! Буёғини энди вақт кўрсатади.

Радамель Фалькао
Радамель Фалькао 425 ўйинда 254та гол уришга муваффақ бўлган. Унинг киритган голари Суарес, Левандовски, Роналдуникидан ёмон эмас. Шунчаки, у ҳам кўпчилик футболчилар каби жароҳатланиб, узоқ танаффус эълон қилишга мажбур бўлган. Агар ҳаммаси аксинча бўлганида, эҳтимол ҳозир “Олтин тўп” унинг совринлари қаторида бўлармиди?!
Фалькао қачонлардир “Атлетико” клубининг “ишоган тоғи” эди. У ҳозир “Монако”да фаолият юритмоқда. У ёмон ўйинчи десак ёлғон гапирган бўламиз. Лекин оқсаётгани, аввалгидек ўйнай олмаяпгани аниқ.

32 ёшли Фалькао энди “Олтин тўп” учун ҳаракат қилаётгани ҳам, соврин учун қайғураётгани ҳам йўқ. Колумбияликнинг орзуси Россия мундиалида иштирок этиб, унда ғолиб бўлиш, холос.

sports.ru сайтидан Нозима Зарипова таржима қилди