"Мен қоламан ва ҳеч нимани ўзгартирмайман". Моуриньо "Севилья" билан ўйиндан кейин дардларини тўкиб солди

Ушбу учрашувдан олдин Жозе Моуриньо тахминан 12 дақиқа вақт давомида ўзи, душманлари, футболдаги мероси ҳақида монолог ўқиди.

"Сиз шундай ифода билан танишмисиз ёки йўқ билмайман, мен эса буни севаман: "Ҳар бир деворнинг эшиги бор". Кимдир мени ташвишга солаётгани учун қочиб кетмоқчи, йўқолиб қолмоқчи ёки йиғламоқчи эмасман. Ер ости йўлида ҳам яширинмоқчимасман. Жамоамни кейинги ўйин учун тайёрламоқдаман, жавобгарликдан қочмайман. 20 ёшлигимда футболда ҳеч ким эдим. Мен шунчаки кимнингдир ғурурли ўғли эдим.

Айни дамда 55 ёшдаман ва мен борман. Футболда фаолият юритганим, иқтидор ва яхши фикрлаш эвазига барча мақсадимга етдим. Кўп, кўп, кўп йиллардан бери мени жуда, жуда, жуда ёмон кўрадиган мухлислар эса: "Яна у ютди, яна у ютди", демоқда.

10 ой давомида ҳеч нима ютмаганимда, охирги совриним 10 ой олдин қўлга киритилганида, "Челси" ва "Ливерпуль"ни ютганим каби, "Севилья"га мағлуб бўлдим ва уларга бахтли онларни тақдим этдим. Диний жиҳатдан шуни келтирмоқчиман: Ҳатто, у душманинг бўлса ҳам, бошқаларнинг муваффақиятидан ҳурсанд бўлиш зарур. Шундай бўлсин. Мен жуда бахтли одамман ва қандайлигимдан доимо мамнунман.

Раҳбарият билан бир йўлдамиз, бу жуда ажойиб ҳиссиёт. Эд Вудворд ва Ричард Арнольд мени тўғри тушунмоқда ва қабул қилмоқда. Орамизда ҳеч қандай келишмовчиликлар йўқ, нималаримиз бор ва кейинги мавсумда нималар қилиш кераклиги борасидаги инвестицияларда ҳамфикрмиз. Биз бир йўлдамиз, ишлар яхши. Ажойиб ишим бор.

Мен ҳар доим мухлисларга ўз фикрларини билдира олишга ҳақлари борлигини, бу эса футболнинг мероси эканлигини айтаман. Мураббийга нима мерос қолган? У охирги марта 2011 йилги Чемпионлар лигасида финалга чиққан жамоани қабул қилиб олган.

"Юнайтед" 2011 йилги Чемпионлар лигасидан кейин: 2012 йилда гуруҳдан чиқа олмаган, ўшанда уларнинг таркиби жорий мавсумдаги "Бенфика", "Базель" ёки Руминиянинг "Оцелул"и каби бўлган. 2013 йилда 1/8 финалда мен бошқарган "Реал"дан мағлуб бўлди. 2014 йилда ҳам омадсизлик, бу сафар чорак финалда.

2015 йилда эса умуман еврокубокларда қатнашмади. 2016 йилда яна гуруҳ босқичидан кейинги омадсизлик, 3-ўринни олиб, Европа лигасидан ҳам чиқиб кетишди. 2017 йилда Европа лигасида ғалаба қозониб, яна Европа чемпионлар лигасига қайтди. Бу турнирнинг гуруҳ босқичида 18 имкониятдан 15 очко жамғариб, кейинги босқичга йўлланма. 1/8 финалда мағлубият.

4 нафар ҳар хил мураббий қўл остидаги жамоанинг натижаларини таҳлил қиладиган бўлсак, "Юнайтед" ҳали бирор марта ЕЧЛда яхши натижа қайд эта олмади, икки марта гуруҳ босқичидан чиқиб кетди, энг яхши натижа эса - нимчорак финал. Мана шундай.

Энди АПЛ ҳақида: "Юнайтед" сўнгги бор лигани 2012/13 йилда қўлга киритган. Кейинги тўрт йилда эса еттинчи, тўртинчи, бешинчи ва олтинчи ўринларни эгаллади. Энг яхши натижа - кучли тўртлик. Футбол мероси борасидаги менинг тушунчам - қаерда турган бўлсанг, ўша ердан старт ол. Бугун бу ерда бўлсангиз, кейин бошқа жойда бўласиз. "Манчестер Юнайтед"нинг барча мухлисларини ҳурмат қиламан ва бундан кейин ҳам шундай бўлади. Ким биландир гаплашиб турган вақтингиз улар менинг натижаларимдан хафа бўлишса, мен уларга қандай жамоани қабул қилиб олганлигимни ва улар билан қандай даражага етганимни тушунтириб бераман.

Эсланг, "Реал"ни қабул қилиб олганимда неча футболчиси ЕЧЛнинг чорак финалида ўйнаганди? Хаби Алонсо "Ливерпуль" таркибида, Икер Касильяс "Реал"да, Криштиану Роналду "Манчестер Юнайтед" билан. Қолганлар эса бундан четда қолганди. Мана шундай жамоани қабул қилиб олганман.
Бу ҳақиқий статистика. Мана, "Манчестер Сити" сўнгги 7 йилликда бирор марта кучли тўртликдан пастга тушиб кетмаган. Икки марта чемпион бўлди, балким буни уч марта десак ҳам бўлади, бу 3 ҳафтадан кейин аниқланади. Икки марта иккинчи ўринни эгаллади. Мураббийлар мана шундай жамоаларни қабул қилиб олишади. Яна керакми? Николас Отаменди, Кевин де Брюйне, Фернандиньо, Давид Сильва, Рахим Стерлинг, Серхио Агуэро - бу футболчилар жамоанинг сўнгги йилларда киритган инвестициялари эвазига қўлга киритилган. Ўтган мавсумда неча футболчи жамоани тарк этганини биласизми? Улар ҳозир қаерда, қайси жамоа таркибида ўйнамоқда?

Бу футболнинг меросидир. Қачонки "Юнайтед"ни тарк этадиган бўлсам, мендан кейинги мураббий Лукаку, Матич, ва албатта, Де Хеа билан ишлайди. Бу футболчиларнинг менталитети бошқача, ўйин сифати, статуси, ўйинни тушуниши бошқача. ЕЧЛнинг чорак финалига чиққан жамоаларнинг таркибига қаранг. "Барса" каби бир неча футболчилар клуб шарафини узоқ йиллардан буён ҳимоя қилиб келмоқда. "Реал", "Ювентус" ва "Бавария"да ҳам шундай. Бунга менинг собиқ "Интер"имни ва ўтган йилги "Монако"ни ҳам киритса бўлади.

Кеча клубнинг янги ишчиси билан учрашиб қолдим ва сўрадим: "Нега айнан шу ерда ишлашга қарор қилдинг?". У эса бу ерда ишлар фантастик даражада олиб борилишини, вазифаларнинг юқорилиги ва бу унга ёқишини айтди. Мен ҳам бу ерга айнан шу сабаб билан келганимни айтдим. Агарда бошқа давлатда ишлаганимда чемпионлик совринини эртароқ қўлга киритган бўлардим, бироқ мен бу ердаман. Мен қоламан ва ҳеч нимани ўзгартирмайман ".


Миржалол Норматов таржима қилди