"Ливерпуль" АПЛда футболчиларига дам бера олмайди" — Эрнесто Вальверде иштирокидаги матбуот анжумани (тўлиқ)

"Ливерпуль" АПЛ чемпионлиги учун "Манчестер Сити" билан жиддий рақобат юзага келтирган. Бу буюк ҳужумчиларга эга қудратли жамоа эканлигини биламиз. Мерсисайдликлар юқори даражадаги босим уюштириш ва тезликка эга.

Клопп "Боруссия Дортмунд"даги ишини бу ерда ҳам давом эттирмоқда. Жорий мавсум "Ливерпуль" АПЛда фақат 1 марта мағлуб бўлди. Бу уларнинг кучи, салоҳиятини ифодалайди. 

Иккала учрашувни ҳам яхши ўтказиш керак. "Ливерпуль"га қарши 5 дақиқа етарли даражада яхши ўйин намойиш этилмаса, улар бизни ўз жарима майдончамизга қамаб қўя олишади. 

Месси ўзини яхши ҳис қилмоқда. Ортда қолаётган ойда Леога бошқаларга нисбатан кўпроқ дам олиши учун имконият бердик. 

"Манчестер Юнайтед"га қарши ўйнаган ҳафтада 3 та баҳсда майдонга тушдик. Энди "Ливерпуль" билан учрашяпмиз. Бу ўта меҳнаткаш жамоа ва биз ушбу учрашувга тайёрмиз.

Мухлисларимиз "Камп Ноу"да сўнгги ўйинларда ҳал қилувчи рольни ўйнашди. 90 мингдан ортиқ томошабин ташриф буюрган учрашувлар бўлди. Биз уларнинг қўллаб-қувватлашига муҳтожмиз ва рақиб буни яхши тушуниб турибди.

Ўйлашимча, Клопп "Камп Ноу" футбол уйи эмас, дея айтган гапи орқали ортиқча драма кутилмаслигини таъкидламоқчи бўлган. Бу майдонда 22 футболчи ўйнайдиган оддий футбол ва биз майдонга тушишга тайёрмиз.

Маҳаллий чемпионатдаги ғолиблик, формани яхши ушлаб туришга ёрдам беради. ЕЧЛ ўйинлари орасида ҳар доим ички чемпионат ўйини ҳам бўлади. Чемпион бўлганимиздан хурсандмиз, "Ливерпуль" эса ўз футболчиларига дам олиш имкониятини яратиб бера олмайди. Шунга қарамасдан, бу Европа чемпионлар лигаси ярим финали ва бунда чарчоқ роль ўйнамайди", - дея ўз фикрларини билдириб ўтди Вальверде. 

Эслатиб ўтамиз, "Барселона" - "Ливерпуль" учрашуви эртага Тошкент вақти билан 23:55да бошланади.