Ла Лига. "Даҳшатли Мадрид дербиси" ва 13-турнинг бошқа учрашувлари превьюси

Очиғи, 13-тур олдида турибмизки, бу каби гап-сўзларга, ажобтовур натижаларга ўрганиб ҳам қолдик. Ижтимоий тармоқларда “Реал Мадрид”, “Барселона” каби жамоаларнинг ҳозирги ҳолатини кўрган мухлис “Атлетико”ни чемпионлик билан ҳам табриклашга улгурди. Бошланажак ўйинлар олдидан ўтган турни ҳам эслаб ўтишни жоиз деб топдик. Хўш, аввалги турда нималар бўлганди?

12-турнинг 3 ўйинида 0:0 ҳисоби қайд этилган бўлса, “Гранада” – “Уэска” учрашувида жанговар дуранг қайд этилди – 3:3. “Кадис” ЕЧЛга қараб илтиляптими? Ушбу мавсум Мадриднинг Реалини мағлуб этган жамоа бу сафар ўз майдонида “Барселона”ни мағлуб этди. “Атлетико Мадрид” турнир жадвалида пешқадам. “Вальядолид” устидан қозонилган ғалаба ҳамда “Реал Сосьедад”нинг меҳмонда бир киши кам бўлиб қолган “Алавес”ни юта олмагани ушбу ҳолатга замин яратди. “Реал Мадрид” эса “Севилья”ни минимал ҳисобда мағлубиятга учрата олди. 

Бу турда қандай қизиқарли учрашувлар бўлиб ўтади? Келинг, бугун сизга айни мана шундай учрашувлар анонсини тақдим этамиз. 

Турнинг илк ўйини – “Вальядолид” – “Осасуна”

Тошкент вақти билан 11 декабрдан 12 декабрга ўтар кечаси 01:00 да бўлиб ўтадиган мазкур қарама-қаршилик 13-турга старт беради. Икки хавфли зонада жойлашган жамоалар, ўтган турда бир хил: 0:2 ҳисобида мағлубиятга учрашган. Ўртадаги фарқ бир очко бўлиб турибди ва бундан кейинги ўйинлардаги ҳар бир очко йўқотиш иккиси учун ҳам фақат ва фақат зарарга ишлаши табиий. Агар жамоалар келаси мавсумни Испания Сегундасида бошлашни хоҳлашмаётган бўлса (албатта ҳеч ким хоҳламайди) отни ҳозирданоқ қамчилаганлари маъқул.

Ўзаро ўйинлар: Икки жамоа ўзаро 81 марта учрашувларда иштирок этишган бўлса, шулардан 34 тасида “Осасуна”нинг, 20 тасида “Вальядолид”нинг қўли баланд келган. 27 ўйин эса дуранг натижа билан якунига етган. 

Жамоаларнинг жароҳатланган футболчилари: Серхи Гвардиола, Кико Оливас (“Вальядолид”). Хуан Мануел Перес, Чими Авила, Лукас Торро, Адриан Лопес, Хонатан Родригес (“Осасуна”).

Очколари тенг жамоалар қарама-қаршилиги – “Валенсия” – “Атлетик Бильбао”

Аввалги йилларда мазкур жамоалар турнир жадвалини юқорисида, “Реал”, “Барселона”, “Атлетико” каби жамоаларга қаршилик қилиб юришарди, бироқ бугунги кунда вазият бошқача. Жадвалнинг пастки қисмидан жой олган жамоаларда бир хил: 13 очкодан мавжуд. Қизиғи, тўплар нисбатида ҳам ҳеч бири устунмас, “Валенсия”да 17-17, “Атлетик Бильбао”да 12-12. Мағлубият уларни ҳатто хавфли зонага тушуриб қўя олади. Майдонда ҳақиқий жанг кечадиган ўйинда ким ғолиб бўлишини кузатамиз. Мазкур баҳс шанба куни соат 18:00 да ўтказилади.

Ўзаро ўйинлар: 180 ўйин ўтказилган “Валенсия” – “Атлетик Б” ўртасида. 71 ғалаба “Валенсия”да, 66 таси эса “Атлетик Бильбао” ҳисобида. 43 ўйинда жамоалар муроса кўчасини танлашган. 

Жамоаларнинг жароҳатланган футболчилари: Хосе Луис Гайя, Денис Черишев, Ли Кан Ин, Яспер Силлессен (“Валенсия”). Перу Ноласкоайн (“Атлетик Бильбао”).

Супер тўқнашув, ҳақиқий дерби, титанлар жанги, қисқаси турнинг марказий учрашуви – “Реал Мадрид” – “Атлетико Мадрид”

Шанбадан якшанбага ўтар оқшомингизни безаш учун ушбу вариантни танланг, ҳеч ҳам ачинмайсиз. Турнинг марказий ўйини дея баҳоланаётган баҳс Мадрид дербиси. Чемпионатда ҳа деганда иши юришмаётган, ЕЧЛда плейй-оффга аранг чиқиб олган “Реал”, турнир жадвалида пешқадам “Атлетико Мадрид” билан баҳс олиб боради. Иккиси ҳам “Барселона”ни мағлуб эта олишган. Ушбу ўйиндаги “Атлетико”нинг мағлубияти уларни пешқадамликдан пастга тушириб қўйиши мумкик, лекин “Реал Мадрид” мағлуб бўлса эгаллаб турган ўрнини бўшатиши ва бу уларнинг аҳволини оғирлаштириб юбориши мумкин. Мавсумда энг кам ўтказган жамоа охирги ўйинларда голеадорлик қилаётган Бенземаси бор “Реал”га қарши қандай ўйин ўтказишини 13 декабрга ўтар кечаси, 01:00 да томоша қиламиз.

Ўзаро ўйинлар: 205 та ўйиннинг 104 тасида “Реал Мадрид”, 53 тасида эса “Атлетико Мадрид” ғалабага эришган. 48 ўйин эса дуранг билан якунига етган.

Жамоаларнинг жароҳатланган футболчилари: Федерико Валверде, Эден Азар, Мариано Диас (“Реал Мадрид”). Хосе Хименес, Диего Коста, Мануел Санчес (“Атлетико Мадрид”).

Омадсизликлар гирдобидаги “Барселона” 17-ўриндаги “Леванте”ни енга оладими?

“Барселона” мухлислари дам олиш кунининг оқшомини бедор ўтказишларига сабаб бор, ўз суюклилар “Леванте”ни қабул қилишади. Ҳа, балки рақибни пастки поғонада эканлиги, 11 ўйинда 11 очко тўплаганликлари билан писанд қилмаслар, лекин “Леванте” ўтган тур ўз майдонида “Хетафе”ни 3:0 ҳисобида тор-мор этишга эришди. “Барселона” эса “Кадис”га мағлуб бўлгани эса 3 очко чўнтагимизда дейишга ҳали эрталигини англатади. 13 декабр 01:00 да бўлиб ўтадиган ўйин барчасига ойдинлик киритиб беради. 

Ўзаро ўйинлар: Икки жамоа бор йўғ 34 ўйинда иштирок этган бўлса, катта устунлик каталонияликларда. 25 та ўйинда ғалаба қозонишган бўлишса, 5 ўйинда “Леванте” устун келган. 4 баҳс дуранг билан якунига етган.

Жамоаларнинг жароҳатланган футболчилари: Ансу Фати, Серхи Роберто, Жерар Пике (“Барселона”). Хосе Кампаня, Оскар Дуарте, Шейк Дукуре, Энис Барди (“Леванте”).

Турнинг сўнгги ўйини – “Сельта” – “Кадис”

“Кадис” ЕЧЛга чиқишга ҳаракат қиляптими деган савол риторик эмас, тўғри савол. Охирги вақтда кўрсатаётган натижаси шунга олиб бормоқда. “Реал”ни ҳам “Барселона”ни ҳам мағлуб эта олган жамоа энди “Сельта” меҳмони бўлади. Бу жамоа ҳам тобора ўзини ўнглаб бормоқда. Айни вақтда 16-поғонада бораётган бўлса ҳам ўтган турда “Атлетик Б”ни меҳмонда мағлуб этиб, ўзига бўлган ишончни қайтариб олди. Икки жамоага ҳам ушбу учрашувда қийин бўлади. Майдонда эса бизни жанг кутмоқда. 14 декабрдан 15 декабрга ўтар кечаси, соат 01:00 да кузатамиз.

Ўзаро ўйинлар: Ўтказилган атиги 12 ўйиннинг 6 тасида “Сельта”, 3 тасида “Кадис” устун келган. 3 ўйин эса дуранг билан якунига етган. 

Жамоаларнинг жароҳатланган футболчилари: Давид Хунка, Серхио Алварес, Кевин Васкес, Эмре Мор (“Сельта”). Хосе Мари, Кала, Луисми Кесада, Салва Санчес (“Кадис”).

Мазкур турда шунингдек қуйидаги учрашувлар ҳам ўтказилади:

12.12  20:15  (Тошкент вақти)  “Хетафе” – “Севилья”

12.12  22:30  (Тошкент вақти)  “Уэска” – “Алавес”

13.12  18:00  (Тошкент вақти)  “Реал Сосьедад” – “Эйбар”

13.12  20:15  (Тошкент вақти)  “Бетис” – “Вильярреал”

13.12  22:30  (Тошкент вақти)  “Эльче” – “Гранада”

Бир-биридан қизиқарли кечиши кутилаётган 13-тур учрашувларида марҳабо, азиз мухлис!

Оғабек Самисов тайёрлади