Жамшид Саидов: "Олимпик" ҳимоясини ёриб ўтиш қийин бўлди"

"Афсуски, улар бир киши бўлиб қолганида бундан унумли фойдаланиб кета олмадик. Вазиятлар бўлди, аммо гол уролмадик. "Олимпик" кўплаб вазиятлар яратди дейиш қийин. Улар яхши ҳимояланишди ва ҳимояни ёриб ўтиш қийин бўлди. Ўйин охирида бизнинг футболчимиз ҳам майдондан четлатилди. Шундан сўнг ўйин тартибсиз кўриниш олди. Биз охирги ўйинларда кўрсатган ўйинимизни кўрсатолмадик", – деди Саидов.

- "Қизилқум" биринчи бўлим бошида ўйинни ҳимоядан қуришни бошлагандек туюлди, 13-дақиқада "Олимпик" аъзоси қизил карточка олгач ҳам, жамоангиз бир тайм давомида умуман ҳужум қилгани йўқ, фақат битта вазият бўлди...

- Йўқ, биз ҳимояланмадик. Биз рақибни майдоннинг иккинчи қисмида кутиб олдик. Шунчаки "Олимпик" яхши ҳимояланди ва бизда кўп ҳам вазият бўлмади. Биз ҳимоядан ўйнадик деган фикрдан йироқман. "Олимпик" қандай ўйнашини, ўзимиз нималарга қодирлигимизни билардик. Балки рақиб бир киши кам бўлиб қолганида менсимаслик бўлдими ёки ўзимизга ишонч етишмадими, ҳолатни ўрганиб чиқамиз. Йигитларимизга раҳмат айтмоқчиман, улар ижобий натижа учун охиригача ҳаракат қилишди. Шунингдек, бизни қўллаб-қувватлаб турган навоийлик мухлисларга миннатдорлик билдираман.

- Марказда ўйнаган икки ярим ҳимоячи – Муродбек Раҳматов ва Ифеаньи Ифеаньида хатолар кўп бўлди. Бунга қандай қарайсиз? Улардан қанчалик кўнглингиз тўлди?

- Кўнглим тўлмади. Уларда хатоликлар кўп кузатилди. Айниқса Муродбек ўйинга киришиб кета олмади. Унда соғлиқ билан боғлиқ муаммолар бор, шунинг учун уни алмаштирдим. Бир киши хато қилса, бунинг ортидан қолган футболчилар ҳам хато қилишди – бу занжир каби уланиб кетди. 

- "Қизилқум" 26 ўйиндан 23 тасини ўйнаб бўлди, "Олимпик" эса 21 тасини. Турнир якунланишига 3 тур қолганида, "Олимпик" 3 очко олдинда. Нима деб ўйлайсиз, жамоанинг тўғридан-тўғри Суперлигада қолиш имконияти қандай?

- Суперлигада қолиш учун охиригача курашамиз.