Эронлик журналист: "Ўзбекистонга қарши баҳслар осон кечмаслиги аниқ"

- Қуръа натижалари ҳақида қандай фикрдасиз? Эрон осон гуруҳдан жой олди деб ўйлайсизми?

- Ўйлашимча, жаҳон чемпионатининг дастлабки саралаш босқичида барча гуруҳларнинг ўзига хос қийинчиликлари бор. Шунинг учун Эроннинг рақибларини осон рақиблар деб бўлмайди. Бу гуруҳдаги рақобатчи жамоалар бор куч ва ғайрат билан мусобақада қатнашади ва айниқса, Эронга қарши бор куч салоҳиятини ишга солишади.

- Сизнингча, Ўзбекистон Эрон терма жамоасига муаммо туғдира оладими?

- Ўзбекистон миллий терма жамоаси Эроннинг ушбу гуруҳдаги энг қийин рақиби бўлади деб ўйлайман. Чунки Ўзбекистон терма жамоаси Осиё қитъасининг энг кучли терма жамоаларидан бири ва бу жамоа ўйинчилари юқори техника ва жисмоний кучга эга. Аммо бу гуруҳдаги жамоалар учун Ўзбекистонга қарши ўйинлар осон кечмайди.

- Ўзбекистон гуруҳда Эрондан ўзиб кетиш имкониятини қандай баҳолайсиз?

- Табиийки, буни олдиндан айтиш қийин ва бу ўйин кунидаги кўп факторларга боғлиқ бўлади. Албатта, Европа клубларида эронлик легионерлар борлиги туфайли Эрон миллий футбол терма жамоасининг ҳолати яхшироқдек кўринади. Аммо, айтганимдек, футбол ўйинлари натижаларини башорат қилиш унчалик осон эмас ва биз ўйин куни, жамоаларнинг жисмоний ва руҳий тайёргарлиги, футболчиларнинг мотивацияси, режа ва тактикаларга боғлиқ бўлади ва ушбу факторлар ўйин натижасини ҳал қилади.

Абдулвосит Бектемиров ёзиб олди

Эслатиб ўтамиз, 27 июль куни 2026 йилги ЖЧ ва 2027 йилги ОК мусобақалари 2-қўшма саралаш босқичига қуръа ташланганди. Унда Ўзбекистон "E" гуруҳида Эрон, Туркманистон ва Гонконг/Бутан билан баҳс олиб бориши маълум бўлди.